Atŭm hăm tơdrong kăl hơmet 'lơ̆ng cham char, đe kơdră dêh char Đăk Lăk pơgơ̆r dah tơtenh 'nhăk phe tơgŭm đơ̆ng Jơnŭm pơgơ̆r teh đak truh hăm kon pơlei; pơtruh kơmăi hlŏng đak, anih asong đak sŏ nhă truh rim tơring kon pơlei oei xa; tenh kuăng hơmet 'lơ̆ng hnam trưng, hnam pơgang vă dôm anih tơm kăl ou tenh kuăng pơm jang; jang tơnăp tơdrong tơgŭm đơ̆ng tơ-'ngla bơngai, anih jang 'mêm bơnat truh hăm tơring đak hơbông, ưh kơ jang kơdih kơnh pơm tơhlăk trong nơnăm, pơrăm truh dôm tơdrong jang hơmet ming 'mi kial đak hơbông pơrăm;…

Ƀok Tạ Anh Tuấn, Kơdră Anih jang vei lăng kon pơlei dêh char Đăk Lăk ră hơdah: 'mi kial kơsô̆ 15 hlôi tơhlu truh Biển Đông, jơnŭm pơgơ̆r tôm xah phương tơring đak hơbông athei tơgŭm kon pơlei tenh kuăng, ưh đei lê̆ kon pơlei ưh đei hơnih dăng oei, ưh đei lê̆ kon pơlei pơngot rơvĕt tơngiĕt găng. Atŭm hăm noh, athei kơchăng dôm trong pơm jang vă tơjră hăm rim tơdrong đei ƀôh.