VOV4.Bahnar - Pơ gê ‘năr (23/6), Anih jang Đảng dêh char Dak Lak hlôi pơ gơ̆r Hop akŏm tơ băt hơ dăh tơ drong tơ chơ̆t pơ jing păng tơ ƀôh muh măt Khŭl pơ gơ̆r jang tang găn sa pơ jĭp, ưh kơ ‘lơ̆ng dêh char. Anih pơ gơ̆r jang tang găn sa pơ jĭp, ưh kơ ‘lơ̆ng dêh char Dak Lak đei 15 ‘nu jang yua đơ̆ng ƀok Nguyễn Đình Trung – Bơ ngai jang lơ̆m Trung ương Đảng, Bí thư anih jang Đảng dêh char pơm kơ dră anih jang.

Dôm Phŏ kơ dră ‘noh đei: ƀok Phạm Minh Tấn – Phŏ Bí thư chĕp kơ̆l Anih jang Đảng dêh char; yă H'Lim Niê – Kơ dră Ban Nội chính anih jang Đảng dêh char; ƀok Nguyễn Thượng Hải – Kơ dră Khŭl pơ gơ̆r Anih jang Đảng dêh char: ƀok Lê Văn Nghĩa – Kơ dră Anih jang hơ len lăng kơ Anih jang Đảng dêh char; ƀok Lê Vinh Quy -Kơ dră vei lăng Kŏng an dêh char. Lăp đơ̆ng rŏng Hop akŏm Trung ương 5, hăm jơ hngơ̆m đon tôch kơ tơ tĕnh, tơ păt, Khŭl chĕp kơ̆l anih jang Đảng dêh char Dak Lak hlôi pơ ma dơ nuh, drơ̆ng nơ̆r tơ chơ̆t pơ jing Anih pơ gơ̆r jang găh tang găn sa pơ jĭp, ưh kơ ‘lơ̆ng kơ dêh char. Dak Lak kŭm jing 1 lơ̆m dôm dêh char jăh pơ jing Anih pơ gơ̆r jang kơ dêh char găh tang găn sa pơ jĭp, ưh kơ ‘lơ̆ng.

Thuem: Tơ blơ̆