VOV4.Bahnar - ‘Năr 26/7, Anih pơ gơ̆r jang dêh char Dak Lak găh tơ chă, iŏk akŏm păng băt hơ dăh hơ năn kơ ting lĭnh lôch dŏng teh đak pơ gơ̆r Hop akŏm tơ drong jang tơ chă, iŏk akŏm kơ ting lĭnh năm jang tơ gŭm lôch dŏng teh đak păng bơ ngai joăt jang Việt Nam lôch hơ chăng lơ̆m dôm khei ‘năr tơ blăh vang tơ̆ Campuchia sơ̆, pơ yan tŏ 2021-2022. Kiơ̆ tơ roi tơ băt tơ̆ hop akŏm, đơ̆ng rŏng hloh 4 khei tơ lĕch jang ăn khŭl lĭnh năm tơ̆ dêh char Mondulkiri (teh đak Campuchia), kang ƀô̆, khŭl linh Đội K51 hlôi tơ chă, iŏk akŏm đei 15 kơ ting lĭnh lôch dŏng teh đak tam mă băt hơ dăh hơ năn, lơ̆m noh đei 1 pôm tơ mam ‘noh plim đei chih chư (“Ngọc Chút-27-9-66). Kơ plăh kôch iŏk, Đội K51 hlôi tôch kơ pơ ‘lơ̆ng, hơ len hơ dăh ƀlep dôm tơ mam đơ̆ng Ƀô̆ đô̆i Việt Nam, hơ dai hăm iŏk kơ mâu tơ mam dôm kơ ting lĭnh lôch dŏng teh đak pơ jao ăn Anih vei lăng găh bơ ngai jang - lĭnh jĭ rơ ka păng tơ pôl dêh char Dak Lak ƀlep tơ drong tơ găt.

Dôm khŭl hơ druh tơ dăm tơ̆k ŭnh jrĕnh păng soh nhang tơ̆ dôm lŏk lĭnh lôch dŏng teh đak

Đơ̆ng rŏng hơ nhăk 15 kơ ting lĭnh lôch dŏng teh đak brŏk tơ̆ pơ lei pơ la, Anih jang Đảng dêh char, anih vei lăng kon pơ lei dêh char Dak Lak hlôi pơ gơ̆r lêh hơ pong pơ dong ƀŭ kơ ting 15 ‘nu lĭnh lôch dŏng teh đak lơ̆m Pơ sat lĭnh lôch dŏng teh đak kơ dêh char.

Tơ̆ hop akŏm, Anih vei lăng kon pơ lei dêh char Dak Lak kŭm hlôi drơ̆ng nơ̆r tơ lĕch trong jang, tơ drong tơm, hơ nơ̆ng jang kiơ̆ đei yua tơ drong jang tơ chă, iŏk akŏm, chơ brŏk tơ̆ pơ lei pơ la kơ ting lĭnh năm jang tơ gŭm lôch dŏng teh đak păng bơ ngai joăt jang Việt Nam lôch hơ chăng kiơ̆ rim khei ‘năr tơ blăh tơ̆ Campuchia sơ̆.

Thuem: Tơ blơ̆