VOV4.Bahnar - Kơ tơ̆ng ang đơ̆ng Kơ đông linh Ea H’leo (Ƀô đô̆i vei lăng tơ ring sơ lam dêh char Dak Lak) pơ gê (20/3), đe kăn ƀô̆ linh đơ̆ng kơ đông oei jang hơ doi hăm dôm khul jang kơ pal tơ lĕch trong tơ gŭm ăn kon pơ lei tơ̆ xăh sơ lam Ia Lốp, apŭng Ea Súp, hơ met pơ ‘lơ̆ng hiong răm đơ̆ng ‘mi tih đunh hơ dai hăm phŭt huơ̆r. 

‘Mi tih phŭt huơ̆r tơ̆ Dak Lak

Adrol kơ ‘nŏh, lơ̆m gơ măng (18/3), tơ̆ plei Chiềng păng plei Đóng, xăh Ia Lốp, ưh ê đei ‘mi tih hơ dai hăm phŭt huơ̆r, pơm ăn 10 unh hnam tơ̆ 2 pơ lei hiong răm găh hnam oei păng ƀa hơ ƀo, tơ mam drăm. 2 hnam trưng ‘nŏh Hnam trưng jăl 1 Cầm Bá Thước păng Hnam trưng Mầm non Hoa Lan phŭt hlơk păr bơ bŭng păng pơ răm truh lơ tơ mam ‘năi. 

Đơ̆ng rŏng kơ ‘mi kial, phŭt huơ̆r, Kơ đông linh Ea H’leo tơ tom athei khul linh, kŭm hăm khul kơ dră tơ ring vang tơ gŭm ăn kon pơ lei pơ dŭ hơ met tơ mam ming anih anih sơ đơ̆ng ‘lơ̆ng. Atŭm hăm ‘nŏh, pơ gơ̆r năm ngôi, pơ lung dôm unh hnam đei hnam păk tơ glơ̆h, hiong răm tơ mam drăm; athei kăn ƀô̆, linh tơ gŭm ăn kon pơ lei pơm hơ met hnam oei, hnam hŏk, jăh pơm sơ đơ̆ng tơ drong arih xa dơ̆ng.

Dơ̆ng: Tơ blơ̆