VOV4.Bahnar - Pơ gê (29/5), tơ̆ thĭ xăh Buôn Hồ, Anih jang đoan dêh char Dak Lak pơm lêh tơ lĕch tơ drong jang Druh dăm năm jang tơ gŭm pơ yan he sơ năm 2022 hăm lơ tơ drong jang tôch hơ iă tơ̆ 15 apŭng, Thĭ xăh, plt lơ̆m dêh char Dak Lak hăm tơ drong vang akŏm đơ̆ng hlŏh 10.000 ‘nu đoàn viên, druh dăm lơ̆m dêh char.

Lơ̆m jơ pơm lêh, Anih jang đoan dêh char Dak Lak tơ lĕch 150 triu hlak jên tơ gŭm, chă tơ drong jang ăn druh dăm. Pơ jao 200 tơ nơm ‘long, 1 pôm trong pơ lei đei chô̆ unh điên, hnam tơ gŭm ăn bơ ngai mơ mat tat, anih ngôi pơ chơt ăn hơ iŏh păng tơ gŭm man 1 pôm cham hnam hŏk hôp tơ pôl akŏm đĭ đăng jên jang truh 370 triu.

Mŏ H’Giang Niê, Bí thư đoan dêh char Dak Lak ăn tơ băt, dôm tơ drong jang đơ̆ng Khul druh dăm jang tơ gŭm pơ yan he 2022 vă tưk tơ iung đon jang tơ năp, đon jang tơ gŭm đơ̆ng druh dăm vang atŏk tơ iung mŭk drăm, tơ pôl; pơ jing tơ ring tơ rang ‘nao, tơ ring kơ drâm rơ gei; vei sơ đơ̆ng tơ drong arih xa tơ pôl, vei sơ đơ̆ng tĕh đak, mă loi tơ̆ dôm tơ ring mơ mat tat, tơ ring hơ tăih yăih, tơ ring sơ lam tĕh đak.

Dơ̆ng: Tơ blơ̆