Hop akŏm pơm gru kơnăl ăn hơtŏk tơ-iung 'nao kơ dêh char Đăk Lăk đơ̆ng rŏng kơ hơgrop, atŭm hăm noh pơih đei trong hơtŏk tơ-iung hăm pơkăp jang đunh khei năr, pơm trong hơvơn dôm hơnih tơmơ̆t pơm jang. Lơ̆m pơkăp 'nao, Đăk Lăk tơchơ̆t hơtŏk kơtang hloh kơ tơring tơter Đak dơsĭ Pơbah Tŏk bŏk păng Tây Nguyên, hơtŏk tơ-iung kiơ̆ pơkăp jơk, rơgei păng kơjăp sơđơ̆ng.

Khua hŏk trong jang 'nao, tơplih tơchăr hơgei, tơplih kơsô̆ păng mŭk drăm đak dơsĭ đei dêh char Đăk Lăk sơkơ̆t hơdah jĭ trong jang 3 tơring hơtŏk tơ-iung, 3 tơdrong jang mŭk drăm păng 2 hơnih tơm dơnơm. Lơ̆m noh, tơring Buôn Ma Thuột pơtoi jing sơnong tơm hơtŏk tơ-iung kơ Tây Nguyên, oei tơring gah Hơlĕch đei sơkơ̆t jĭ hơtŏk tơ-iung 'nao gah  kŏng ngĭp, logistics, dơnŏk duk păng mŭk drăm đak dơsĭ, hơtŏk kiơ̆ pơkăp rơhọ jơk 'lơ̆ng, mŭk drăm sơđơ̆ng, tơplih tơchăr 'nao gơh hơgei păng tơplih kơsô̆. Hơdrin hơtŏk GRDP ăn jăl jang 2026-2030 đei đơ̆ng 11%/sơnăm tŏk tơ̆ kơpal, truh sơnăm 2030 rim bơngai jang đei xa yua hloh 153 triu hlj.

Tơ̆ hop akŏm, ƀok Đỗ Hữu Huy, Kơdră Hơnih jang vei lăng kon pơlei dêh char Đăk Lăk sơkơ̆t hơdah: “Tơchơ̆t hơtŏk tơ-iung tenh kuăng, kơjăp sơđơ̆ng gơh đei jơnei mưh tôm hơnih jang chinh trĭ yak hơdoi hăm hơnih jang mŭk drăm, hơnih asong jang. Tơdrong mă dôm hơnih asong jang hơpơi 'meh ưh hơdrô̆ jĭ tơchơ̆t hơtŏk tơ-iung mă oei jing minh jơnŭm pơgơ̆r pơm jang hơdah 'lơ̆ng, kơjăp păng yak hơdoi. Kơyuơ noh, atŭm hăm tơdrong keh đang pơkăp, asong ming man hơnih jang păng hơmet akŏm groi teh, Đăk Lăk sơkơ̆t hơdah hơmet 'lơ̆ng hanh chinh, hơmet 'lơ̆ng tơdrong pơm jang tĕch pơdro jing sơnong jang dơnơm, gĭt kăl hloh; iŏk kon pơlei păng hơnih jang mŭk drăm pơm Hơnih tơm vă pơvih pơm jang”

Tơ̆ hop akŏm, dêh char Đăk Lăk adoi tơbang hơnăn dôm tơdrong jang hơvơn asong jang hơdrol hloh, akŏm lơ̆m choh jang xa kiơ̆ trong 'nao păng pơm tơlĕch tơmam drăm, pơm tơlĕch unh hơyuh rơgoh, logistics păng ming man hơnih jang. Hơnih jang vei lăng kon pơlei dêh char Đăk Lăk hlôi pơjao tơchơ̆t drơ̆ng nơ̆r asong ăn 25 tơdrong jang, hăm kơsô̆ jên asong jang hloh 40.290 tih hlj. Dêh char adoi kĭ hla bar tơƀlŏk jang hơdoi hăm 78 hơnih asong jang, đei jên asong jang pơkăp mă blŭng hloh 1 triu tih hlj.