Kiơ̆ tơroi, tơdrong pôk rơih đei pơgơ̆r sơđơ̆ng, trŏ khôi luơ̆t, tơpă jing năr akŏm tôm kơ kon pơlei. Jơ̆p dêh char đei 2.120 hơnih tah kơphĭu hăm 2.118 jơnŭm pôk rơih; lơ̆m noh đei 11 hơnih pơgơ̆r pôk rơih hrôih đơ̆ng năr 14/3. Kơsô̆ kon pơlei tah hla tơ̆ Đăk Lăk năm pôk rơih đei truh 99,96%. Tơdrong akŏm pơgia, dêh char Đăk Lăk hlôi pôk rơih tôm 15 bơngai tang măt ăn Kuô̆k hô̆i jăl 16 kiơ̆ kơsô̆ đei asong. Hăm Hô̆i đŏng kon pơlei dêh char jăl jang 2026–2031, đei 84 'nu đei pôk jang, trŏ hăm tơdrong pơkăp tơlĕch. Tơ̆ xah, jơ̆p dêh char đei 2.443 bơngai đei pôk jang tang măt Hô̆i đŏng kon pơlei (kơƀah 1 'nu pơtêng hăm pơkăp tơlĕch).

Tơ̆ hop akŏm, Hơnih pơgơ̆r pôk rơih dêh char Đăk Lăk adoi tơbang hơnăn dôm bơngai đei pôk jang tang măt Hô̆i đŏng kon pơlei dêh char jăl jang 2026–2031 kiơ̆ hơnih pôk rơih. Tơdrong tơbang hơnăn đei pôk noh hơdah trŏ nhen tơchơ̆t tơlĕch đơ̆ng khôi luơ̆t gah tơdrong pôk rơih. Đơ̆ng rŏng kơ tơbang tơdrong đei jơnei pôk rơih dêh char Đăk Lăk gô keh đang rim hô sơ, hla bar kăl vă pơtruh ăn rim hơnih jang Trung ương trŏ nhen tơchơ̆t tơlĕch.