Dêh char Dak Lak dang ei đei dang 9.000 ‘nu kon pơlei oei arih xa, hŏk pơhrăm păng bơ̆ jang tơ̆ 29 tĕh đak lơ̆m apŭng plenh tĕh. Khei ‘năr âu ki, kon pơlei oei xa tơ̆ tĕh đak đe hơnơ̆ng ƀlŏk truh tơ̆ pơlei pơla, tơƀôh jơhngâm đon ‘mêm kơ tĕh đak, kŭm hăm kon pơlei lơ̆m tĕh đak vang vei lăng tơdrong pơm tơm tơ̆ dôm achon kông, đak dơsĭ kơ tĕh đak, vang tơgop jơhngâm ăn tơdrong pơjing pơlei pơla. Lơ̆m 5 sơnăm âu ki, kơsô̆ jên kon pơlei oei xa tơ̆ tĕh đak đe gơih ăn kơtum kơtŏng tơ̆ dêh char Dak Lak hlŏh 133 triu USD.

Tơ̆ jơ tơƀâp, hăm ƀĕnh jơhngâm đon chơt hơiă, ‘mêm băt băl, dôm bơngai tang măt đei mơ̆ng nơ̆r tơroi găh tơdrong ‘lơ̆ng păng dôm tơdrong jơnei đơ̆ng jang atŏk tơiung mŭk drăm, tơpôl tơ̆ dêh char Dak Lak lơ̆m khei ‘năr âu ki. Atŭm hăm ‘nŏh roi tơƀôh dôm tơdrong hơpơi ‘meh đơ̆ng kon pơlei oei xa hơtăih kơ tĕh đak, ‘mĕh vă dêh char hơnơ̆ng pơjing tơdrong ‘lơ̆ng vă kon pơlei oei xa tơ̆ tĕh đak đe gơ̆h tơmât jên jang, vang pơjing păng atŏk tơiung pơlei pơla.