Đại tá Đinh Văn Hưng, Kơdră jang lơ̆m Anih chĕp kơ̆l đảng dêh char, Chính ủy Anih chĕp kơ̆l pơgơ̆r khul linh dêh char Đắk Lắk pơma hơdăh, Tơblăh jơnei Buôn Ma Thuột jĭ um rup ang hơdăh đơ̆ng jơhngâm đon tơblăh tôch kơtang đơ̆ng khul linh păng kon pơlei bơ̆n. Atŭm hăm ‘nŏh athei kăn ƀô̆, linh lơ̆m khul linh tơblăh kơ dêh char hơnơ̆ng chĕp vei, tưk tơiung tơdrong juăt ‘lơ̆ng đơ̆ng pơtâp pơhrăm, kơchăng tơblăh, pơjing khul linh pran kơtang, pơm lăp hăm rim tơdrong jang lơ̆m chăl ‘nao.

Tơ̆ pơsat linh lôch tang ăn teh đak kơ dêh char Đắk Lắk – anih oei ƀŭ hơmet hlŏh 2.300 kơ̆l linh lôch tang ăn teh đak, lơ̆m jơhngâm đon kŭp yom, ‘mêm bơnê, dôm kơdră chĕp kơ̆l dêh char păng bơngai tang măt vang pơyơ̆r pơkao, sŏh plang nhang tơ̆ hơnăp Rup man Ƀlŏk hơdơ̆r, ‘măn 1 pơnĭt kŭp kơ̆l hơdơ̆r kơ đe linh hlôi hŭt hơkâu lôch tang yoa tơdrong rơngei kơ hơdrĕch hơdrung, pơjing đei 1 teh đak kơjăp ‘lơ̆ng. Đơ̆ng rŏng kơ ‘nŏh, khul tang măt plang pơyơ̆r nhang ƀlŏk hơdơ̆r kơ đe linh kăch mang lôch tang tơ̆ Anih gru groa gĭt kăl Hnam phak Buôn Ma Thuột – anih sơ̆ hlôi rôp kron lơ pơnă chinh trĭ lơ̆m tơdrong iung jang kăch mang ƀât dôm sơnăm blŭng kơ a nglŏ XX păng kŭm jing anih pơjing đei chi ƀô Đảng mă blŭng tơ̆ dêh char Đắk Lắk (so).