Pơma tơ̆ jơ pơm lêh, Kơdră Jơnŭm pơgơ̆r kon pơlei dêh char Đắk Lắk Cao Thị Hòa An tơƀlŏk dơ̆ng jăl trong 95 sơnăm jô̆ đơ̆ng Chi bộ Đảng Cộng sản mă blŭng kơ Phú Yên pơjing ‘năr 5/10/1930 tơ̆ kueng Đồng Bé, plei Phước Long, xăh Xuân Long, apŭng Đồng Xuân, dang ei găh xăh Đồng Xuân, dêh char Đắk Lắk.

Chi bộ kơplăh doh sơ̆ đei 9 đảng viên, yua đơ̆ng ƀok Phan Lưu Thanh pơm Bí thư. Yak hloh 95 sơnăm, đơ̆ng Chi bộ mă blŭng hăm 9 đảng viên, truh dang ei, đơ̆ng rŏng tơmơ̆t hơdai Đảng bộ Phú Yên păng Đắk Lắk, lơ̆m dêh char đĭ đei hloh 137.000 đảng viên; 100% pơlei pơla, tơring kon pơlei tă kơ đei chi bộ Đảng ngăl, tơƀôh hơdăh hơnăp jang tơm chĭnh trĭ, pơm kơjăp lơ̆m khŭl jang chĭnh trĭ tơring.