Tơ̆ Hop akŏm, dêh char Đắk Lắk tơbăt hơdăh hơnăn dôm tơdrong jang tơgŭm hơdrol sơng đei tơmơ̆t jên jang, akŏm lơ̆m choh jang sa kơmăy kơmŏk ‘nao păng pơm tơlĕch jrŭ, kơmăy kơmŏk pơm tơlĕch, ŭnh hơyuh rơgoh, logistics păng anih jang kăl. Anih vei lăng kon pơlei dêh char Đắk Lắk hlôi pơjao tơdrong tơchơ̆t drơ̆ng ăn trong jang tơmơ̆t jên jang ăn 25 tơdrong jang, hăm akŏm jên tơmơ̆t jang hloh 40.290 ti hlak jên. Dêh char kŭm kĭ hla ar chih tơƀlŏk jang hơdai hăm 78 bơngai tơmơ̆t jên jang, đei akŏm jên pơm hla ar blŭng a hloh 1 triệu ti hlak jên.

Pơma pơgơ̆r tơ̆ hop akŏm, Đại tướng Phan Văn Giang, Kơdră Anih tơm vei lăng Khŭl lĭnh pơma hơdăh, tơdrong tơbăt hơdăh trong tơproh jang đei tơdrong ‘lơ̆ng gĭt kăl hăm tơdrong hơtŏk tơiung kơ Đắk Lắk lơ̆m jăl jang ‘nao. Khŭl kơdră teh đak hơmĕng Đắk Lắk gô tơgĕch yua ‘lơ̆ng dôm tơdrong hiôk păng đei yua vă pơm tơdrong ‘lơ̆ng hơtŏk tơiung ‘nao, hơtŏk ‘lơ̆ng, kĕ pơjei đơ̆ng mŭk drăm.