Lơ̆m dêh char dang ei đei hloh 19.500 anih mơdro sa bơ̆jang lơ̆m vă đĭ đăng rim tơdrong jang, lơ anih mơdro sa hlôi lĕch tơ̆ anih tĕch mơdro apŭng plĕnh teh, tơƀôh hơdăh hơnăn tơmam Đắk Lắk. Kŭm hăm tơdrong jang pơm tơlĕch, tĕch mơdro, khŭl mơdro sa oei hơdrin vang jang chă tơgŭm đe, tơgŭm tơring mơnat tat. Đơ̆ng blŭng sơnăm truh dang ei, GRDP dêh char tŏk vă jê̆ 7%, tĕch tơlĕch tơ̆ teh đak đe đei hloh 2,3 ti USD, tĕch le tơmam tŏk vă jê̆ 18%, hơnih tơmơ̆t jên jang hơnơ̆ng tơplih ‘lơ̆ng hăm hloh 2.300 anih mơdro sa pơjing ‘nao.

Pơma tơ̆ hop akŏm, Kơdră Anih vei lăng kon pơlei dêh char Đắk Lắk Tạ Anh Tuấn chih iŏk tơgop đơ̆ng tơpôl anih mơdro sa, tơƀôh hơdăh khŭl kơdră chĕp kơ̆l gô yak hơdai, hơmet ming bơ̆jang, pơtrŭt tơplih kơsô̆, pơm hơnih rơđăh tơpăt, hiôk ăn anih mơdro sa hơtŏk tơiung. ‘Măng âu, Anih vei lăng kon pơlei dêh char hơpăh Bằng khen ăn kơ 18 khŭl grŭp păng 30 ‘nu đei jang hơgei hloh.