Mŭk drăm kơsô̆ kơ Đăk Lăk đei sơkơ̆t hơdah jing trong hơtŏk kiơ̆ 2 tơchơ̆t: pơjing tơdrong jang kơmăi kơmŏk tơroi tơbăt, păng jang gah kơmăi kơsô̆; atŭm hăm noh hơ-'nhăk kơmăi kơsô̆ pơlan să lơ̆m tơdrong jang mŭk drăm dơnơm nhen choh jang xa, pơm tơlĕch tơmam drăm, tĕch pơdro, tơmang pơhiơ̆ păng logistics.

Tơchơ̆t truh sơnăm 2030, mŭk drăm kơsô̆ tơgop đơ̆ng 30% GRDP tŏk tơ̆ kơpal; 100% tơdrong kăl đei chih akŏm atŭm păng pơkăp lơ̆m kơmăi kơsô̆ vă chă tơroi tơbăt.

Vă gơh đei jơnei tơchơ̆t ou, Đăk Lăk gô akŏm keh đang tơchơ̆t tơgŭm; hơtŏk kơmăi kơmŏk chih akŏm yư lĭu kơsô̆; hơtŏk tơdrong jang mŭk drăm kơsô̆ păng vei sơđơ̆ng kơmăi kơmŏk sơđơ̆ng mạng.

Tơ̆ 'măng hop akŏm gah mŭk drăm kơsô̆ kơ Hơnih jang vei lăng kon pơlei dêh char Đăk Lăk, lơ nơ̆r tơgop akhan, tơdrong tơm ưh hơdrô̆ asong răt kơmăi kơmŏk dah mă pơjing dôm tơdrong tơm, mă athei tơplih đơ̆ng hơtŏk kiơ̆ tơdrong pơyua jing hơtŏk gah pơyua kơmăi kơmŏk yư lĭu tơroi tơbăt, kiơ̆ đơ̆ng noh pơjing đei mŭk drăm pơyua tơpă hloh. Tơdrong pơgơ̆r jang kih thuơ̆t kơsô̆ adoi đei tơlĕch vă hơlen păng pơgơ̆r jang kiơ̆ dôm tơchơ̆t hơtŏk mŭk drăm kơsô̆.

Kơdră Hơnih jang vei lăng kon pơlei dêh char Đăk Lăk  Đỗ Hữu Huy athei chih akŏm tơchơ̆t jang mŭk drăm kơsô̆ kiơ̆ pơkăp “6 hơdah”. Rim sơnong jang athei sơkơ̆t hơdah minh hơnih jang pơgơ̆r păng đei tơmam drăm mă hơdah: “Pơjao hơdah ăn rim hơnih jang, rim tơdrong jang păng tơmam drăm kơ khei mă ou noh yă kiơ, khei đơ̆ng rŏng noh yă kiơ. Athei rim khei đei 1 tơmam drăm mă hơdah, hơdah gah bơngai, hơdah gah tơdrong jang. Lơ̆m tơlĕch jang kơ dêh char hlôi tơlĕch ăn rim xah phương đei minh KOL, bơngai mă đe ư ang vă tơbang dôm tơdrong tơmang pơhiơ̆ đang kơ noh tơmam drăm OCOP kơ tơring lơ̆m mạng tơpôl. Inh athei pơm tơlĕch tơmam drăm mă pơkăp trŏ ƀlep păng gơh đei yua”