VOV4.bahnar - Tơgŭm hơdrŭh tơdăm tŏk iŏk đei kon jên, pơjing rim khŭl vă pơma dơnŭh tơbăt dĭh băl trong jang hơ iă găh pơjing tơdrong jang dăh mă pơgơ̆r rim ‘măng pơlong găh pơjing tơdrong jang ‘nŏh trong mă dêh char Dak Lăk tŏk bŏk tơlĕch jang vă tơgŭm djru hơdrŭh tơdăm, yak hơdoi hăm hơdrŭh tơdăm, mă kăl hơdrŭh tơdăm tơring chŏh jang sa lơ̆m pơjing tơdrong jang sa.

‘Nhŏng Huỳnh Ngọc Hội (ao găm) jang sa iŏk yua kơ jăp hăm trong jang rong hơbau lê dreng

Đơ̆ng rŏng 3 sơnăm rong hơbau lê dreng, ‘nhŏng Huỳnh Ngọc Hội oei tơ̆ thôn 10, tơring Ea Bar, apŭng Buôn Đôn, dêh char Dak Lăk hlôi đei hơnĭh răt iŏk sơđơ̆ng. dang mĭnh sơnăm kơ au, ‘nhŏng Hội pơjing dơnau rong să đơ̆ng 350 m2 jing 2.000 m2. Lơ̆m 1 khei, ‘nhŏng tĕch đơ̆ng 20 truh 30.000 tŏ kon hơbau lê dreng hăm kơ jă 300 hlak jên lơ̆m 1 tŏ, păng 4 khei mĭnh ‘măng tĕch hơbau tĭh hăm kơ jă 65.000 hlak jên lơ̆m 1 kĭ.

‘Nhŏng Hội jei pơjing păng pơm bơngai chĕp kơ̆l Khŭl jang hơdoi hơdrŭh tơdăm rong hơbau lê dreng apŭng Buôn Đôn hăm 25 ‘nu bơngai. Atŭm hăm pơtho kih thuơ̆t, tĕch ăn kon hơbau rong ăn rim bơngai lơ̆m khŭl, ‘nhŏng Hội răt iŏk hloi hơbau păng hŏk pơ răm pơm tơlĕch tơmam drăm đơ̆ng hơbau vă tĕch kơdro đei iŏk yua kơ jăp. ‘Nhŏng Huỳnh Ngọc Hội tơbăt, lơ̆m khei năr pơjing tơdrong jang, ‘nhŏng đei Dơnŏ anĭh Đoàn apŭng tơgum djru păng pơtho tơbăt pơm hla bơar, adoi nhen tơbăt ăn hơnih răt iŏk. Gơnơm đơ̆ng nŏh ‘nhŏng mă kĕ yak hlŏh tơnap tap vă atŏk tơ iung jang sa.“Dơnŏ anĭh Đoàn jei tơgŭm jru păng vă ‘nhŏng ŏh akŏm atŏk tơ iung păng tơroi tơbăt găh bơ̆n hăm mĭnh ƀar hơnĭh răt iŏk, tơgum djru găh kon jên dăh mă găh pơm hla bơar vă tơmam drăm tĕch mơdro sơđơ̆ng ƀiơ̆. Đei Dơnŏ anĭh Đoàn apŭng tơgŭm djru adoi nhen rim hơnĭh jang tơ̆ apung ‘nŏh trong jang au đei lang să jang kiơ̆, hăm pơjing đei tơmam drăm krot vă tĕch mơdro tơmam drăm ăn kon pơlei đei sơđơ̆ng ƀiơ̆, kơ jă măt ƀiơ̆”.

Vang jang lơ̆m rim Khŭl găh pơjing tơdrong jang, tơgoăt tĕch răt tơmam drăm ăn hơdrŭh tơdăm ‘nŏh trong jang kơ hơnĭh đoàn vă tơgŭm djru tơdăm pơjing tơdrong jang

Kiơ̆ đơ̆ng ‘nhŏng Nguyễn Quang Trung, Bí thư Đoàn apŭng Buôn Đôn, Khŭl jang hơdoi hơdrŭh tơdăm rong hơbau lê dreng Buôn Đôn ‘nŏh khŭl jang hơdoi mă blŭng kơ hơdrŭh tơdăm đei pơjing tơ̆ apŭng găh lơ̆m Dơnŏ anĭh Đoàn apŭng. Atŭm hăm ‘nŏh, Dơnŏ anĭh Đoàn apŭng jei pơjing Khul pơjing tơdrong jang hơdrŭh tơdăm vang iung jang.

        Vă pơjing rơvơn ăn hơdrŭh tơdăm lơ̆m apŭng pơjing tơdrong jang, khŭl đoàn hlôi tơgum djru vă hơdrŭh tơdăm đei tŏk iŏk kon jên hăm jên chĕh tŏ sĕt, pơjing rim khŭl jang mŭk drăm, khŭl tơgop jên jang sa. Trŭh dang ei, rim hơnĭh đoàn apŭng Buôn Đôn tŏk bŏk vei lăng vă jê̆ 67 ti hlak jên kon jên tŏk iŏk dơ̆ng pang tang măt. Đei 33 ‘nu bơngai păng hơnĭh jang đei sơng iŏk kon jên tơ iung pơjing tơdrong jang đơ̆ng Hơnĭh mong jên tĕh đak xak tơlang tơdrong jang păng rim kon jên jang đơ̆ng tơring. Apŭng jei lăng kơ jăp tơ iung pơjing păng atŏk tơ iung rim hơnĭh jang hơdrol, trong jang sa hle đei iŏk yua kơ jăp vă lang să lơ̆m hơdrŭh tơdăm. Gơnơm đơ̆ng nŏh, lơ̆m 3 sơnăm kơ au, tơdrong jang pơjing tơdrong jang tơ̆ Buôn Đôn đei lơ tơdrong hơ iă, sơđơ̆ng ăn tơdrong ‘mĕh vă đơ̆ng hơdrŭh tơdăm.“Rim trong jang sa kơ hơdrŭh tơdăm, rim bơngai jei hlôi đei lơ trong hơ iă, mă kăl ‘nŏh rim boăl jei pơ̆n hơnhăk tơmam drăm bơ̆n năm rim ‘măng pơlong kơ yuơ apŭng dăh mă dêh char pơgơ̆r. Nhôn hơnơ̆ng pơchŏh trong păng tơbăt tơtom ăn rim bơngai jang đoàn hơdrŭh tơdăm lơ̆m apŭng băt rim tơdrong kơtơ̆ng ang ƀơm trŭh trong bơ̆ jang, trong tơgŭm djru đơ̆ng dêh char. Chă rơ̆ih dôm bơngai ‘lơ̆ng păng đei tơmam drăm hơ iă lơ̆m atŏk tơ iung mŭk drăm kơ tơring vă hơnơ̆ng pơtho tơbăt, tơgŭm djru rim boăl vă jang sa sơđơ̆ng hlŏh dơ̆ng”.

‘Nhŏng Y Lê Pas Tơr, Kơ iĕng Kơdră chĕp pơgơ̆r Dơnŏ anĭh Đoàn dêh char, Kơdră chĕp pơgơ̆r Khŭl hơdrŭh tơdăm Việt Nam dêh char Dak Lăk hơlen, lơ̆m 4 sơnăm kơ au, tơdrong jang pơjing tơdrong jang lơ̆m hơdrŭh tơdăm tơ̆ Dak Lăk roi năr roi atŏk tơ iung păng đei lơ hơ iă. Dôm hơdrŭh tơdăm jang sa hơgei hlôi pơjing đei trong lang să, pơtrŭt ăn hơdrŭh tơdăm anai ‘mĕh vă atŏk tơ iung.

        Băt hơdăh tơdrong ‘mĕh vă pơjing tơdrong jang kơ hơdrŭh tơdăm, hơnĭh đoàn hlôi păng tŏk bŏk iung jang hơdoi hăm rim hơnĭh bơ̆ jang tơ̆ tơring vă pơjing rơvơn, trong rơvơn tơgŭm djru hơdrŭh tơdăm pơjing tơdrong jang. Mă kăl, mă đơ̆ng yak hlŏh dôm tơdrong tơnap tap đơ̆ng jĭ hơbŭh pơm ăn khei năr au ki, mă lei tơ̆ rim apŭng, thĭ xăh lơ̆m dêh char, rim tơdrong jang hle, trong jang hơ iă oei đei rim boăl tơchă kơ dĭh, tơgoăt dĭh băl vă pơtrŭt kơtang lơ̆m pơjing tơdrong jang ăn kơ dĭh.“Mă blŭng, găh pơtho pơhrrăm ming ‘nŏh jei kăl tơchĕng hơlen rim trong jang trŏ ƀlep, mă kăl lơ̆m khei ‘năr đei jĭ hơbŭh. Tơdrong mă ƀar ‘nŏh kon jên jang, nhôn jei ‘mĕh vă tơgoăt, pơtho tơbăt ăn rim boăl vă sơng iŏk đei kon jên jang lơ. Mă pêng dơ̆ng ‘nŏh tơdrong hơdrin tơgoăt dĭh băl, jang hơdoi dih băl kơ rim Khŭl vă đei rim khŭl jang mơdro sa jơhnơr hơdrol hăm rim bơngai jang mơdro sa jơhnơr đơ̆ng rŏng tơgoăt dĭh băl, tĕch răt rim tơmam drăm păng tơgoăt hăm rim bơngai joăt jang, rim hơnih mơdro sa đe ư hơnhang ang hơnhăk vă đe sư chă pơtho tơbăt ăn hơdrŭh tơdăm”.

        Hăm dôm tơdrong tơgum djru đơ̆ng khŭl kơdră chĕp pơgơ̆r păng rim hơnĭh bơ̆ jang, lơ hơdrŭh tơdăm tơ̆ Dak Lăk hlôi hơdrin yak hlŏh tơnap tap vă pơjing tơdrong jang. Dôm tơdrong tơnap tap găh jên jang sa, găh pơm hla bơar, hơnĭh răt iŏk roi năr roi đei xek tơlang pơ ‘lơ̆ng gô tơgŭm ăn tơdrong pơjing tơdrong jang kơ đe hơdrŭh tơdăm tơring chŏh jang sa đei rơvơn hlŏh dơ̆ng. Đơ̆ng nŏh pơjing đei jơhngơm pran ranh să, tơpă đei iŏk yua kơ jăp kơ rim tơdrong pơjing tơdrong jang đe hơdrŭh tơdăm.

            Bơngai chĭh: H’ Xíu

Tơblơ̆ nơ̆r: Amazưt