Jơnŭm pơgơ̆r kon pơlei dêh char Đắk Lắk jăl XI ‘nao drơ̆ng nơ̆r ăn tơdrong tơchơ̆t chih hơdăh tơdrong tơgŭm sơng iŏk, tơgŭm ăn tơdrong pơtho pơhrăm, atŏk tơiung khul bơngai jang đơ̆ng 2026–2031. Jên tơgŭm blŭng a lơ hlŏh ‘nŏh truh 2 ti hlak jên hăm giáo sư đei iŏk jang tơ̆ tơring. Tơdrong tơgŭm vă sơng iŏk bơngai jang rơgei lơ̆m 12 tơdrong jang tơm, đei choh jang xa, tơmât yoa kơmăy kơmŏk rơgei, jang kơmăy pơm tơlĕch tơmam, unh hơyuh rơgoh, logistics, chă tơmang lăng, pơtho pơhrăm, jên hu, khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆.

Hăm bơngai đei iŏk jang pơm bơngai jang ăn teh đak păng pơkăp bơ̆ jang tŏ sĕt hlŏh ‘nŏh 7 sơnăm, jên tơgŭm 1 vât blŭng a đei chih đơ̆ng 500 triu hlak jên hăm bơngai đei ƀăng đăi hŏk, 700 triu hlak jên hăm bơngai hŏk thak si, 1 ti hlak jên hăm bơngai hŏk tiên si, 1,5 ti hlak jên hăm phó giáo sư păng 2 ti hlak jên hăm giáo sư. Ƀok Trương Ngọc Tuấn, Kơdră Anih jang Nội vụ dêh char Đắk Lắk ăn tơbăt, tơdrong tơgŭm đei hơmĕng vang tơgop pơm hơtŏk khul jang rơgei, pơm lăp hăm tơdrong ‘mĕh vă jang tŏk mŭk drăm, tơpôl kơ dêh char Đắk Lắk lơ̆m chăl ‘nao.