Lêh tơchĕng hơdrol pơgơ̆r đơ̆ng ‘năr 15/12/2026 truh ‘năr 4/4/2027, hăm dôm tơdrong jang tơm lơ̆m khei 3 păng blŭng khei 4/2027, hơdrin sơng đei 1,3 triệu ‘nu tơmoi truh chă ngôi, năm chă lăng.

Tơdrong ‘nao đơ̆ng lêh ‘măng âu ‘noh tơklep roi tơƀôh cheh phe hăm hơtŏk tơiung tơmam, đơ̆ng tơring tơmam truh pơm tơlĕch păng tĕch mơdro. Dôm tơdrong jang nhen Giĕng lêh Cheh phe ‘lơ̆ng kơ Việt Nam, Hơnih tơplih ‘nao pơcheh hơgei tơdrong jang cheh phe, Pơlong Bơngai jang chŭn mir pơjei băl jang hơgei, Hop akŏm apŭng plĕnh teh “Buôn Ma Thuột – Tơring tơm Robusta kơ apŭng plĕnh teh” păng pơtrŭt tơmơ̆t jên jang pơm tơlĕch jrŭ đei hơmĕng tơgop hơtŏk ‘lơ̆ng kơjă cheh phe.

Hơnih pơm lêh kŭm đei pơih să kiơ̆ trong jang hơdai dôm hơnih truh đơ̆ng Buôn Ma Thuột, Buôn Đôn, Dơnâu đak Lắk, Dơnâu đak Ea Kao truh Tuy Hòa, hơdai hăm joh ayŏ kơdŏ soang, tơplŏng kơdâu, tơmam sa păng tơmang lăng đak dơsĭ. Hla ar chih apĭnh pơgơ̆r tơdrong jang roadshow “Đơ̆ng bri kông truh đak dơsĭ ‘lơ̆ng rŏ”, kŭm hăm giĕng cheh phe huch đĕch tơ̆ tơring păih Hơlĕch vă hơtŏk loi dơ̆ng jang hơdai tơmang lăng.

Kăl kơ lăng truh, Đắk Lắk tơchĕng hơdrol pơjing dôm tơmam hơnơ̆ng pơyua ăn kon pơlei păng tơmoi đơ̆ng rŏng lêh, ‘noh Kơphô̆ Cheh phe Buôn Ma Thuột, 2 hơnih check-in tơ̆ Cham să 10 tháng 3 păng Cham să Phú Yên, kŭm hăm tơdrong jang Hnam kơjung show tơ̆ Hơnih ‘măn răk tơmam drăm so Đắk Lắk. Lơ̆m noh, Hnam kơjung show đei tơlĕch jang pơgơ̆r hơnơ̆ng prăt lơ̆m sơnăm.

Kiơ̆ kơ ƀok Trần Hồng Tiến, Kơdră Anih vei lăng găh Joh ayŏ, Tơplŏng kơdâu păng Tơmang lăng dêh char Đắk Lắk, lêh ‘măng âu lăng kăl hơtŏk tơdrong joăt joe, hơnhăk um rup cheh phe Buôn Ma Thuột truh jê̆ hloh hăm tơpôl apŭng plĕnh teh. ‘Ngoăih kơ dôm kênh chih kơtơ̆ng ang păng kơmăy kơsô̆, Anih jang athei jang hơdai hăm Kŏng ti tơm jang găh Gre păr Việt Nam roi tơƀôh lêh lơ̆m dôm ‘măng păr lơ̆m teh đak păng apŭng plĕnh teh.

“Sơnăm ‘nâu tơlĕch ăn tơdrong tơ̆ âu, bơ̆n ‘meh roi tơƀôh, roi tơbăt lêh păng hơnhăk lêh truh hăm apŭng plĕnh teh. Anih jang athei jang hơdai hăm Hơnih jang Hunitech kơ Kŏng ti tơm jang găh Gre păr  Việt Nam vă roi tơƀôh lêh lơ̆m dôm ‘măng păr kơ Vietnam Airlines”.

Kơdră Anih vei lăng kon pơlei dêh char Đắk Lắk Đỗ Hữu Huy tơbăt, hơtŏk tơiung tơmang lăng - pơvih pơvăn ‘noh jĭ trong năm đunh đai, Lêh cheh phe Buôn Ma Thuột ưh khan lăp dơ̆ng tơ̆ tơdrong jang roi tơƀôh mă athei pơm tơdrong ‘lơ̆ng jang tŏk, hơtŏk ‘lơ̆ng kơjă tơmam đơ̆ng choh jang sa đei păng anih dơ̆ng tơmang lăng kơ tơring. Găh tơƀôh hơnăn, ƀok Đỗ Hữu Huy drơ̆ng nơ̆r vei hơnăn krao tơpă “Lêh Cheh phe Buôn Ma Thuột”, hơdai hăm athei roi tơbăt tơƀôh pơm ‘lơ̆ng hơiă tơdrong đei yua ‘lơ̆ng đơ̆ng cheh phe Robusta tơring.

“Lêh Cheh phe Buôn Ma Thuột jĭ hơnăn kơ teh đak, oei nơ̆r slogan vă pơm hơnăn roi tơƀôh ‘noh jĭ “Buôn Ma Thuột – Tơring tơm cheh phe Robusta kơsô̆ 1 apŭng plĕnh teh. Bơ̆n tơƀôh hơdăh Robusta đơ̆ng bơ̆n ‘noh jĭ kơsô̆ 1 bơih, oei cheh phe atŭm pơđĭ lơ̆m apŭng plĕnh teh ‘noh bơ̆n kơsô̆ 2. Păng Buôn Ma Thuột đei 40% kơsô̆ tơmam cheh phe kơ lơ̆m teh đak”.