Trong ‘nâu kơjung vă jê̆ 28,5 km, pơm klĕch dôm tơring Cuôr Đăng, Quảng Phú, Ea Nuôl păng dôm phương Tân An, Buôn Ma Thuột. Anih mă blŭng kơ trong âu tơƀư̆h hăm trong gre 14, găh xăh Cuôr Đăng; anĭh hơtuch ‘nŏh tơƀư̆h trong 1 kơ dêh char, găh xăh Ea Nuôl. Tơdrong jang găh grŭp B, hăm jên jang đơ̆ng Trung ương truh 1.080 ti păng jên dêh char đei 720 ti.

Kiơ̆ tơdrong pơkăp, trong gre ‘nâu gơh kơdâu tôch đa truh 80 km/jơ, trong xă 12 met, đei hloi gơng, simong, hơbong răih nang păng dôm tơdrong kăl pơm ‘lơ̆ng ăn gre kơdâu vih vât tơ̆ trong. Khei ‘năr pơm trong đơ̆ng sơnăm 2026 truh sơnăm 2029. Mưh man đang, trong ver 2 gô tơƀưh tơring gah Pơmơ̆t, Pơmơ̆t kơTu Buôn Ma Thuột hăm trong gre kơdâu hrĕnh Khánh Hòa – Buôn Ma Thuột păng dôm jăl trong gĭt kăl nai; vang tơgop pơm tơjur ƀiơ̆ gre kơdâu mât lĕch tôch lơ lơ̆m tơring kơdrơ̆m, pơih xă tơring kơdrơ̆m, sơng iŏk jên tơmât jang atŏk tơiung mŭk drăm – tơpôl kơ dêh char.