Xăh Ea M’Droh đei pơjing kiơ̆ lơ̆m tơmơ̆t hơdai 3 xăh Ea M’Droh, Ea Mnang păng Quảng Hiệp, găh apŭng Cư M’gar hơdrol sơ̆. Hơtuch sơnăm 2025, xăh oei 202 unh hnam dơnuh hin, đei 2,67% kơsô̆ unh hnam kon pơlei; hơdai hăm ‘noh, xăh oei vă jê̆ 600 unh hnam dơnuh hin kăl kơ hơnơ̆ng đei tơgŭm sơđơ̆ng tơdrong hơrih sa.

Tơ̆ jơ pơma dơnuh, lơ unh hnam kon pơlei kơtă tơroi tơdrong mơmat tat, tơlĕch trong jang tơgŭm tơdrong jang sa, tơdrong jang păng hnam oei. Ƀok Lê Tiến Dũng, oei tơ̆ plei Bình Hòa tơbăt, đơ̆ng rŏng 1 sơnăm đei tơgŭm rơmo yŏng mă lei tam mă iŏk đei jơnei, ƀok apĭnh hơmet ming trong jang tơgŭm mă lăp ƀiơ̆ hăm tơdrong hiôk kơ unh hnam.

 “Sơnăm sơ̆ ĭnh đei tơgŭm 2 tŏ rơmo mă lei 1 sơnăm bơih rơmo oei tam mă đei kiĕo kơna năr ‘nâu inh nơ̆r tơgop hăm xăh apĭnh tơplih jing rong rơmo hmă. Xăh hlôi tơl kơtă, gô asong tơplih ăn 4 tŏ tơmo, ‘noh 2 tŏ rơmo tih, 2 tŏ rơmo kon. Khŭl kơdră tơring gô bơngơ̆t truh kon pơlei thoi noh nhôn bơnê dêh”.

Kŭm hăm nơ̆r apĭnh găh tơdrong jang sa, lơ unh hnam dơnuh hin tơƀôh đon ‘meh vă đei tơgŭm tơchă tơdrong jang, đei hnam oei kơjăp. Khŭl kơdră xăh Ea M’Droh chih iŏk, pơma dơnuh kơtă găh dôm tơdrong ‘meh vă đơ̆ng rim bơngai, pơm tơdrong ‘lơ̆ng băt hơdăh ‘meh vă tơgŭm dôm unh hnam.

Đơ̆ng blŭng sơnăm 2025 truh dang ei, bơ̆jang kiơ̆ dôm tơdrong jang tơgŭm tơdrong jang sa, tơdrong hơrih, xăh Ea M’Droh hlôi đei dôm tơdrong tơgŭm tơtom truh dôm unh hnam dơnuh hin. Lơ̆m noh, xăh hlôi tơgŭm 76 tŏ rơmo vă 38 unh hnam dơnuh hin hơtŏk tơiung vei rong rơmo yŏng. Mă lei, tơpă yan âu tơlĕch jang ăn ƀôh kăl kơ kiơ̆ hơdai tơdrong hiôk đơ̆ng rim unh hnam vă hơmet ming trong jang tơdrong jang sa mưh kăl. Sơnăm ‘nâu, xăh tơlĕch ăn tơdrong hơgăt tơjur 93 unh hnam dơnuh hin, hăm trong jang klăih song kiơ̆ tơdrong tơm pơm ăn dơnuh hin păng tơdrong kĕ yak tŏk đơ̆ng rim unh hnam.

Ƀok Trần Doãn Tới, Ƀĭ thư Đảng uy xah Ea M’Droh ăn tơbăt, tơring gô tơlĕch dôm trong jang phara dih băl, đơ̆ng tơgŭm pơm jang truh chă asong tơdrong jang păng vei sơđơ̆ng tơdrong tơgŭm xa yua lơ̆m tơpôl:

“Tơplih khôi juăt so ưh kơ 'lơ̆ng, tơgŭm pơtho gah khua hŏk ki thươ̆t, tơm tơđah, kon yŏng hăm unh hnam oei đei teh choh jang. Hăm dôm unh hnam oei đei jơhngơ̆m pơm jang noh gô asong tơdrong jang, tơgŭm năm pơm jang tơ̆ teh đak đe păng pơm jang lơ̆m teh đak. Hăm dôm unh hnam pă kĕ pơm jang, ưh đei jơhngơ̆m pơm jang noh jơnŭm pơgơ̆r tơring gô pơm trong hiôk gah tơgŭm lơ̆m tơpôl păng tơgŭm gah hnam oei, tơmam drăm xa”