Vă vei sơđơ̆ng sơnong pơyua ăn bơngai đei teh ƀơm thu iŏk, vei sơđơ̆ng hơtŏk hơnih oei, tơdrong hơrih păng trong jang xa, tơdrong chih akŏm Luơ̆t Groi teh (hơmet tơplih) hlôi tơchơ̆t bơngai đei teh oei ƀơm thu iŏk đei hrŭ 'mong hăm teh đei tơdrong pơyua le lăi hăm teh ƀơm thu iŏk, teh nai dah mă hrŭ 'mong hăm jên. Gah tơdrong ou, bơngai tang măt Đặng Đức Hiệp (dêh char Lâm Đồng) akhan, kăl hơlen mă hơdah tơdrong iŏk thu teh hloi hăm dôm tơdrong ming man kăp gĭt.  

Ƀôh hơdah đơ̆ng tơdrong jang sir kôch bô-xít lơ̆m tơring teh să tơ̆ Lâm Đồng tơrĕk truh lơ unh hnam kon pơlei, bơngai tang măt tơƀôh hơdah, tơdrong sir kôch hơdrô̆ tơ̆ tăl kơpal teh lơ̆m tŏ sĕt khei năr păng gơh pơdreo dơ̆ng hơnih teh đei. Mưh iŏk yua pơkăp thu iŏk hlŏng hloi gô pơm tơnap tap tih gah jên hrŭ 'mong, păng asong hơnih oei 'nao. Đơ̆ng tơdrong mă ou, bơngai tang măt Đặng Đức Hiệp pơtruh nơ̆r:  Bơ̆n kŭm athei hơlen hơdah tơdrong thu iŏk teh pơkăp kiơ̆ khei năr dah mă Teh đak thuê teh kon pơlei vă vei sơđơ̆ng ăn tơdrong jang sir kôch tơmo kăp gĭt lơ̆m teh. Thoi noh tơjur ƀiơ̆ tơnap tap hăm jên mong, da ƀiơ̆ tơnap gah tơdrong hrŭ 'mong, asong hơnih oei 'nao, teh choh jang; tơjur đei kơjă pơm jang vă vei sơđơ̆ng ăn tơdrong tơgar hăm dôm tơmam drăm đơ̆ng rŏng kơ pơm tơlĕch. Gah tơdrong ou kăl đei hơlen hơdah chih hơmet lơ̆m luơ̆t vă pơm trong hiôk hloh ăn tơdrong jang sir iŏk tơmam kăp gĭt lơ̆m teh păng hơdah noh sir iŏk bô xít tơ̆ Lâm Đồng.

Atŭm tơrĕk truh tơdrong jang vei lăng păng iŏk yua tơnăp teh, bơngai tang măt Bùi Xuân Thống (pơlei tơm Đồng Nai) drơ̆ng nơ̆r hơmet klah asong kơluăi teh, atŭm hăm noh pơtruh nơ̆r kăl pơm hơdah tơchơ̆t gah teh 'long bri vă hơmet tơdrong ưh đei hơtŏ hăm kơsô̆ chih pơkăp đơ̆ng hơnih jang gah teh păng hơnih jang gah 'long bri. Gah sơnong pơyua păng pơm jang đơ̆ng bơngai iŏk yua teh, bơngai tang măt athei chih hơmet tơchơ̆t vei vêr bơngai tĕch teh, iŏk tơgop jên hăm tơdrong yua teh păng mŭk drăm tơguăt hăm teh đei pơtoi iŏk yua trŏ tơdrong lơ̆m khei năr pơkăp oei gơh yua teh. Hăm pơkăp thuê teh vă sir iŏk tơmam kăp gĭt lơ̆m teh vă pơm tơmam ming man, bơngai tang măt Bùi Xuân Thống pơtruh nơ̆r:  Kiơ̆ tơdrong đei ƀôh tơ̆ Đồng Nai, minh ƀar tơring kăl sir iŏk tơmam kăp gĭt lơ̆m teh vă pơm tơmam ming man ăn dôm hơnih ming man kăl, lơ̆m kơplah tơdrong yua teh đei hloi teh pơtăm 'long đunh khei năr, teh choh pơtăm rim sơnăm. Kơyuơ noh, pơtruh nơ̆r ưh đei pơkăp khei năr hăm bri pơtăm mă athei hơlen hơdah kiơ̆ pơkăp kơluăi teh, lơ̆m noh teh pơtăm 'long đunh sơnăm, teh choh pơtăm rim sơnăm vă pơm trong chih akŏm khôi luơ̆t iŏk yua hăm dôm tơdrong jang atăm.