Tơ̆ jơ sơng, Thủ tướng bơnê kơ WEF păng dôm teh đang vang jang atŭm hăm Việt Nam, tơgop pơm ăn tơdrong hop akŏm jing hơnih pơma đam, tơroh đơ̆ng jơnŭm pơgơ̆r teh đak, hơnih jang mŭk drăm păng jơnŭm jang khua hŏk. Thủ tướng bơnê kơ dôm tơdrong jang tơroi tơbăt hlôh vao păng tơroi gah kơmăi kơmŏk 'nao pơih lơ trong hiôk vă jang hơdoi, chơ chă trong hơtŏk tơ-iung 'nao.

Ƀok Stephan Mergenthaler bơnê kơ sơkơ̆t hơtŏk tơ-iung đunh khei năr đơ̆ng Việt Nam, mă kăl noh sơkơ̆t hơtŏk tơ-iung gơnơm lơ̆m khua hŏk, kơmăi kơmŏk tơplih 'nao tơchăr hơgei păng jang mŭk drăm tơ-'ngla; atŭm hăm noh sơkơ̆t hơdah WEF hơpơi 'meh jang hơdoi hăm Việt Nam. Pơkăp truh sơnăm APEC 2027 kơyuơ Việt Nam pơgơ̆r, WEF kơchăng jang hơdoi tơ̆ jăl kơpal hloh, tơroh hơnih jang mŭk drăm păng dôm teh đak vang jang lơ̆m kơpal teh. Thủ tướng pơtruh nơ̆r hăm WEF tơgŭm gah trong jang 'nao, tơroi gah tơdrong hlôh vao, hơvơn asong jang păng dah hrôih chih akŏm tơchơ̆t jang hơdoi ăn jăl jang đơ̆ng rŏng kơnh.