Pơma tơ̆ jơ pơm lêh, Tổng Bí thư, Kơdră teh đak Tô Lâm athei hnam trưng hơnơ̆ng tơplih ‘nao, hơtŏk ‘lơ̆ng pơtho pơhrăm, hơtŏk tơiung bơngai jang ‘lơ̆ng păng pơhrăm ming bơngai jang hơgei ăn kơ teh đak. Hơdai hăm ‘noh, tŭn pran tơchĕng hơlen khoa hŏk, pơtruh tơdrong trŏ pơyua ăn chih hơmet pơ ‘lơ̆ng trong jang, tơlih ‘nao tơdrong jang tŏk păng hơtŏk ‘lơ̆ng jơnei iŏk yua dôm jên jang teh đak.

Hnam trưng kăl kơ hơtŏk loi dơ̆ng pơtho pơhrăm lơ tơdrong jang, iŏk yua kơmăy kơmŏk, tơplih kơsô̆, tơklep hăm tơchĕng hơlen hăm yan âu păng ‘meh vă hơtŏk tơiung kơ tơring, anih mơdro sa. Tổng Bí thư, Kơdră teh đak pơma hơdăh, ‘meh tơchĕng hơlen đei trong jrŭ, athei pơtho kơjăp ăn khŭl jang, hla ar chih răk păng dôm grŭp tơchĕng hơlen pran. Lăng kăl tơchĕng hơlen, tơklep hăm pơtho pơhrăm đơ̆ng rŏng đăi hŏk; pơtrŭt tơchĕng hơlen lơ tơdrong jang păng jang hơdai hăm dôm anih jang khoa hŏk gơh hơgei. Pơtrŭt pơma pơjăh đei tơdrong ‘lơ̆ng, pơyom tơdrong tơpăt păng pơm tơdrong hiôk vă hơdrin druh kiơ̆ dôm tơdrong ‘noh. Yak hloh 50 sơnăm pơjing păng hơtŏk tơiung, truh dang ei, Hnam trưng Đại học Kinh tế pơlei tơm Hồ Chí Minh đei pơtho vă jê̆ 40.000 ‘nu sinh viên, bơngai hŏk păng bơngai hŏk đơ̆ng rŏng kơ đăi hŏk.