Ră hơdah gah tơdrong hrŭ 'mong, tơgŭm hơnih oei jang xa tơrĕk kơtă truh tơdrong hơrih kơ kon pơlei păng kŭm jing tơdrong đei lơ tơkêng tơhlou tơnap tap, đunh khei năr, rim bơngai tang măt akhan, athei sơkơ̆t hơdah kơjă lơ̆m tơring, tơgŭm kon pơlei băt hơdah tơdrong hrŭ 'mong mă tơhlăk ƀơ̆t thu iŏk teh. Hăm teh choh jang xa oei lơ̆m tơring kon pơlei đei tơm a iŏk yua sơđơ̆ng kiơ̆ lơ chăl bơngai, bơngai tang măt Lê Hữu Trí, khul Khánh Hòa pơtruh nơ̆r, hơlen pơkăp tơdrong hrŭ 'mong trŏ hăm tơm a la chă teh, tơdrong iŏk yua păng tơdrong đei tơpă lơ̆m tơdrong thu iŏk teh.

Kiơ̆ bơngai tang măt Dương Khắc Mai, khul Lâm Đồng, kăl pơm hơdah tơchơ̆t hơnih oei 'nao athei 'lơ̆ng hloh kơ hơnih oei so hăm dôm tơchơ̆t hơdah, gơh hơlen pơkăp. Rim bơngai tang măt akhan, Chih akŏm Luơ̆t hlôi đei tơrĕk hloh truh tơdrong kăl sơđơ̆ng tơdrong hơrih, pơm jang, tĕch pơdro păng hơmet trong jang xa ăn bơngai đei teh ƀơm thu iŏk. Tơchơ̆t tơgŭm thu iŏk teh athei đei sơkơ̆t hơdah hăm tơdrong yuih teh iŏk ming man mă oei hăm tơdrong gơh pơm sơđơ̆ng tơdrong hơrih păng hơmet jang xa ăn dôm bơngai ƀơm iŏk teh.