Pơma tơ̆ lêh tơbăt, Tổng Bí thư, Kơdră teh đak Tô Lâm tơroi rơđăh, vă chĕp kơ̆l pơgơ̆r teh đak hơtŏk tơiung, Đảng athei ưh kơ pơdơh tơplih ‘nao đon chĕng, hơtŏk tơiung lý luận. Hloh 30 sơnăm, Jơnŭm  Lý luận Trung ương hlôi tơƀôh hơdăh hơnăp jang tơm roi tơƀôh tơdrong jang găh lý luận chính trị; akŏm đon gơh hơgei đơ̆ng rim kơdră chĕp kơ̆l, vei lăng, bơngai jang khoa hŏk, kang ƀô̆ đảng viên păng Kon pơlei. Teh đak tŏk bŏk tơlĕch jang Tơdrong tơchơ̆t Hop akŏm Bơngai tang măt lơ̆m teh đak ‘măng mă XIV kơ Đảng, hơdrin jang kiơ̆ dôm tơdrong hơgăt hơtŏk tơiung teh đak truh sơnăm 2030 păng sơnăm 2045 păng 100 sơnăm đơ̆ng rŏng dơ̆ng.

‘Meh vă tơlĕch ăn ‘noh jĭ tŏk hrĕnh, kơjăp, hơtŏk ‘lơ̆ng tơdrong kĕ pơm tơ ‘ngak hơdih, vei sơđơ̆ng hrĕnh, hơtŏ hơnơ̆ng lơ̆m tơpôl păng tơdrong hơrih sa Kon pơlei. Tổng Bí thư, Kơdră teh đak Tô Lâm athei Jơnŭm hơnơ̆ng tơƀôh hơdăh păng hơtŏk hơnăp jang tơm, dơnơm lơ̆m tơchĕng hơlen lý luận, pơtôch yan âu păng roi tơƀôh tơdrong jang đơ̆ng Đảng, kơchăng tơdra hơdrol păng chă ƀôh dôm tơdrong ‘nao. Jơnŭm akŏm tơchĕng hơlen dôm tơdrong lý luận ‘lơ̆ng păng dôm tơdrong ‘nao, kăl kơ teh đak, kơ chăl hle. Hơdai hăm năm jrŭ lơ̆m hơtŏk ‘lơ̆ng đon tơchĕng chĕp kơ̆l pơgơ̆r, tơplih ‘nao vei lăng teh đak; hơmet pơ ‘lơ̆ng trŏ lăp tơdrong pơvei đơ̆ng Teh đak, anih tĕch mơdro păng tơpôl; hơtŏk ‘lơ̆ng iŏk yua lơ, jơnei iŏk yua jên jang.