Tơ̆ jơ tơƀơ̆p, Tổng Bí thư, Kơdră chĕp pơgơ̆r Teh đak bơnê dôm tơdrong tơgop đơ̆ng rim jơhnơr drŏ kăn tang măt Kuô̆k hô̆i, adoi pơma hơdăh athei atŏk kơtang jơhngơ̆m đon hơgei, nuih mơng păng hơnăp jang kơ bơngai drŏ kăn lơ̆m bơ̆ jang pơjing khôi luơ̆t, dăr lăng păng tơchơ̆t rim tơdrong kăl kơ teh đak. Kuô̆k hô̆i jăl XVI đei 150 ‘nu drŏ kăn tang măt, tơmơ̆t 30% akŏp măt bơngai tang măt. Tổng Bí thư, Kơdră chĕp pơgơ̆r Teh đak ‘meh vă rim drŏ kăn tang măt vang iung jang kơtang lơ̆m tơdrong chă tơchĕng hơlen, tơ iung pơjing trong bơ̆ jang; pơm hơdăh trong kơnăl, trŏ păng kĕ jang kiơ̆ kơ rim tơdrong tơchơ̆t khôi luơ̆t. Adoi, kăl vei kơjăp nơ̆r pơma, tơlĕch nơ̆r athei đei iok yoa atŭm, tang găn tơdrong iŏk yoa sa hơpăh hơdrô̆, khul đei ƀơm truh trong bơ̆ jang. Tổng Bí thư, Kơdră chĕp pơgơ̆r Teh đak jei athei rim drŏ kăn tang măt tơklep kơjăp hăm tơring, mơ̆ng dôm nơ̆r tơgop, jơhngơ̆m đon hơpơi ‘meh vă đơ̆ng bơngai tăh hla; dăr lăng truh troch tơdrong xek tơlang rim nơ̆r athei đơ̆ng kon pơlei. Mă kăl, kăl iung jang kơtang hloh dơ̆ng vang tơchơ̆t rim trong bơ̆ jang atŏk tơ iung mŭk drăm-tơpôl, kon jên jang teh đak sơnăm 2027, sơđơ̆ng đei iŏk yoa trŏ lăp kơ drŏ kăn păng kon pơlei, tơgop lơ̆m jang kiơ̆ rim trong tơlĕch jang atŏk tơ iung teh đak truh sơnăm 2030, lăng truh sơnăm 2045.