Hơnih dôm hnam kơmăy ŭnh điên kial đei tơlĕch jang ‘noh Hnam kơmăy ŭnh điên kial Buôn Hồ 1 păng Buôn Hồ 2 hăm akŏm kŏng suơ̆t 40 MW, kŭm hăm Hnam kơmăy ŭnh điên kial Cư M’gar 2 đei kŏng suơ̆t 10 MW. Akŏm ‘meh vă iŏk yua teh dang 10,5 hek tar, găh tơring kơ dôm xăh Ea Tul, Pơng Drang păng dôm phường Buôn Hồ, Cư Bao. Tơdrong jang yua đơ̆ng 1 kŏng ti găh Grŭp jang Ŭnh điên Phalăng (EDF) pơm tơ ‘ngla tơmơ̆t jên jang.

Tơchĕng hơdrol dôm hnam kơmăy gô jang đang tơmơ̆t bơ̆jang, pơih ŭnh điên lơ̆m hơtuch sơnăm 2028. Tơ̆ lêh tơlĕch jang, kơdră chĕp kơ̆l Anih vei lăng kon pơlei dêh char Đắk Lắk, pơma hơdăh dêh char ling lang hôn bơnê păng sơng iŏk dôm bơngai tơmơ̆t jên jang, mă loi ‘noh jĭ lơ̆m tơdrong jang ŭnh hơyuh rơgoh. ‘Nâu jĭ tơdrong jang mă Đắk Lắk đei tơmam tôch kơ tih hăm hloh 14.000MW (Mêgawat) hlôi đei Thủ tướng teh đak kĭ ăn lơ̆m Trong vă jang ŭnh điên VIII.