Tơdrong jang âu vă jĭ ‘măng pơjei bơ̆ jang tơm, krao akŏm rim anih jang păng tơring tơrang vang bơ̆jang, hơmet pơ ‘lơ̆ng dôm tơdrong tơhlăk găh teh, hơtŏk hrĕnh dôm tơdrong jang tih tơ̆ dêh char. Tơdrong jang âu akŏm lơ̆m 40 tơdrong jang tih, adrin hơlen năng, chih iŏk rim tơdrong bơ̆ jang; pơm pơkeh đĭ đăng hla ar hrŭ ‘mong jên teh; khŏm jang đei đơ̆ng 90-95% teh vă chưk pơ ‘ngoăih ăn rim tơdrong jang; tơlĕch đĭ đăng jên hrŭ ‘mong, jên tơgŭm, pơjing anih oei xa ‘nao hlôi đei hơmet hơdrol păng sek tơlang kĕh rim tơdrong tơkêng, nơ̆r pơma apinh kiơ̆ hơnăp gơ̆h jang.

Tơdrong jang ‘nâu đei tơlĕch lơ̆m 45 năr hăm 3 jăl, đei: hơlen năng, hơmet pơ ‘lơ̆ng dôm tơdrong tơhlăk; adrin jô̆ hơlen, kĭ ăn trong jang, kla tôm jên hrŭ ‘mong păng pơjao teh ăn tơdrong jang, jang đang rim tơdrong hơgăt oei đei dơ̆ng, sek tơlang dôm tơdrong oei ưh ‘lơ̆ng hơiă, chih pơtôch păng lăng dơ̆ng dôm tơdrong hlôi jang đei.