Tơ̆ hop akŏm, dôm bơngai tang măt mơ̆ng dôm anih jang kơpal roi tơƀôh dôm tơdrong tơm vă pơvih ăn tơdrong pôk rơih, đei: rơih hơmet bơngai jang găh hơnăp jang kơ Anih pơgơ̆r Đảng dêh char; pơgơ̆r hop akŏm hăm bơngai tăh hla, pơma nuh, rơih bơngai lĕch pơjei (Anih MTTQ Việt Nam dêh char); chih hơmet, vei lăng păng hơgăt kơsô̆ jên vă pôk rơih (Anih vei lăng jên hu dêh char); tơdrong pơgơ̆r pôk rơih (Anih jang Nội vụ dêh char); tơdrong ƀơk ‘long yâu, vei lăng sơđơ̆ng (Công an dêh char); păng tơdrong roi tơbăt pôk rơih (Anih joh ayŏ kơ dŏ xoang, tơplŏng kơdâu păng chă tơmang lăng).

Tơ̆ hop akŏm, ƀok Lương Nguyễn Minh Triết, Bí thư Đảng dêh char, Kơdră Anih pơgơ̆r pôk rơih kơ dêh char Đắk Lắk tơtă, hrei ‘nâu rim anih jang chinh trĭ tơ̆ dêh char oei bơ̆ jang hloi lơ tơdrong jang tôch gĭt kăl, mă loi ‘nŏh jĭ hơmet pơ ‘lơ̆ng tơdrong hiong răm đơ̆ng ‘mi tih đak lơ̆p, dôm anih jang, tơring tơrang athei hơtŏk đon jang mă tơnăp, bơ̆ jang mă hrĕnh, gơ̆h hơgei, “bơ̆ jang lơ hlŏh 2, 3 ‘măng” vă vei lăng ‘lơ̆ng tơdrong arih xa, jang xa ăn kon pơlei hai, tơlĕch jang ‘lơ̆ng tơdrong pôk rơih hai.