Hơdrol kơ noh, Anih jang vei lăng kon pơlei dêh char Đăk Lăk hlôi đei hla bar pơtruh ăn kơdră kơ dôm anih jang đei tơrĕk păng kơdră Anih jang vei lăng kon pơlei dôm xah, phương tenh kuăng jang hơdoi vă tơlĕch dôm trong jang kăl. Rim tơring tơjih đak dơsĭ athei đei trong vei sơđơ̆ng ăn kon bơngai, mŭk drăm, mă kăl noh tơ̆ rim anih oei tơmang pơhiơ̆, anih rong, rôp you ka hơdang; pơtho tơnăp anih dơ̆ng ăn duk; ming hơmet hơdrou rong ka hơdang. Tơring groi kông athei tơroi tơtom gah 'mi kial truh hăm kon pơlei; tơroi hơdah gah trong tơjră hăm đak hơbông, teh hơlih.

Atŭm hăm noh, hơlen tơnăp tơ̆ dôm tơring ƀơm răm hli, kơchăng 'nhăk kon pơlei truh oei tơ̆ anih sơđơ̆ng. Rim anih jang kơchăng akŏm khul jang, tơmam drăm kăl kiơ̆ pơkăp “4 minh anih”; hơlen trong vei sơđơ̆ng thong hơbong pơnơ̆ đak, hli đei đak lŏk jroh kơtang, ưh asong kon bơngai păng gre vih vơ̆t găn ga mưh ưh đei tơdrong sơđơ̆ng.