Hop akŏm hlôi sơng hloh 100 nơ̆r pơtruh đơ̆ng hơnih jang mŭk drăm, hơp tak xah păng unh hnam jang tĕch pơdro, akŏm lơ̆m dôm trong jang hơtŏk 'lơ̆ng asong jang, pơklaih tơnap tap ăn tơdrong jang tĕch pơdro păng hơtŏk jang mŭk drăm tơ-'ngla pơm tơm. Dôm nơ̆r pơtruh pơtoi keh đang tơchơ̆t jang, pơm ƀônh hla bar hanh chinh, pơklaih dôm tơdrong tơhlăk tơhlĭn gah teh, pơkăp asong jang, ming man păng cham char; atŭm hăm noh hơtŏk tơdrong hiôk lơ̆m tŏk iŏk jên jang, tơchơ̆t tơgŭm thuê̆ păng dôm tơchơ̆t hơtŏk tơ-iung nai.

Sơkơ̆t pơtôch hop akŏm, ƀok Lương Nguyễn Minh Triết, jang lơ̆m Trung ương Đảng, Ƀĭ thư Tĭnh uy, Kơdră Khul tang măt Kuô̆k hô̆i dêh char Đăk Lăk pơjao sơnong jang ăn Hơnih jang vei lăng kon pơlei dêh char chă trong tơplih 'nao trong akŏm pơma đam, tơmơ̆ng, chih akŏm dôm nơ̆r pơtruh đơ̆ng rim hơnih jang mŭk drăm. Asong hơdah gah sơnong jang ăn rim bơngai jang, hơnih jang lơ̆m tơdrong sek tơlang tenh kuăng dôm nơ̆r pơtruh. Khul tang măt ăn kuô̆k hô̆i, Hô̆i đŏng kon pơlei dêh char Đăk Lăk adoi tơlĕch hơlen dôm nơ̆r pơkăp đơ̆ng Hơnih jang vei lăng kon pơlei dêh char adoi nhen rim hơnih jang, rim tơring hăm hơnih jang mŭk drăm.