Xăh Ea Bá đơ̆ng rŏng tơmơ̆t hơdai să hloh 130 km², kơsô̆ kon pơlei hloh 8.300 ‘nu, lơ̆m noh dang 60% ‘noh bơngai Ê Đê. Hơnih bơ̆jang kơ xăh hơtăih kơ hơnih tơm dêh char Đắk Lắk dang 130 km. Ƀok Nguyễn Hoài Vũ, Bí thư Đảng uỷ xăh, roi tơbăt: đơ̆ng ‘năr 1/7 truh dang ei, mă đơ̆ng kơmăy kơmŏk đei iŏk akŏm đơ̆ng 2 anih jang xăh so mă lei oei bơ̆jang kiơ̆ đei 80% hla ar bơ̆jang trực tuyến tơgŭm kon pơlei păng hloh 90% dôm ‘măng hop akŏm trực tuyến hăm Anih jang Đảng dêh char, Anih vei lăng kon pơlei dêh char, dôm anih jang. ‘Nâu jĭ hơdrin tih đơ̆ng đĭ đăng kang ƀô̆, bơngai jang Đảng păng Anih vei lăng kon pơlei xăh. Ƀok Vũ tơroi tơpă yan âu păng 1,2 nơ̆r apĭnh găh tơplih kơsô̆ tơ̆ tơring:

“Yua kơ xăh ‘noh jĭ tơring hơtăih hơtŏ tôch kơ pơmat tat, anih jang kăl oei lơ ưh kơ ‘lơ̆ng, kơmăy kơmŏk đơ̆ng 2 anih jang so akŏm hơdai tam mă hơtŏ, hlôh vao khoa hŏk kơmăy kơmŏk đơ̆ng ‘nhŏng oh jang kŭm tam mă gan kloh kloh. Nhôn ‘meh dêh char jăh bơngơ̆t truh tơmơ̆t jên jang pơm hơmet, răt tôm kơmăy kơmŏk, pơih dôm lăm pơhrăm tơdrong hlôh vao ăn bơngai jang teh đak găh kơmăy kơmăy roi tơbăt, trong yua AI vă pơm lăp hăm ‘meh vă hơnăp jang lơ̆m tơdrong ‘nao.”

Lei lăi thoi noh mơ̆n, xăh Ea Hiao kŭm jing xăh hơtăih hơtŏ kơ dêh char Đắk Lắk ƀơ̆t hơtăih kơ anih bơ̆jang dêh char hloh 100 km. Ƀok Phạm Văn Đảng, Kơdră Anih vei lăng kon pơlei xăh, tơroi: tơ̆ Anih bơ̆jang teh đak kơ xăh, hloh 65% hla ar bơ̆jang păng hloh 90% ‘măng hop akŏm kơ xăh hăm kơdră kơpal đei pơgơ̆r trực tuyến. Mă lei, yua đơ̆ng kơmăy kơmŏk tam mă hơtŏ, lơ hla ar oei đei pơgăn, dôm ‘măng hop akŏm ƀônh kơ đei pơdơh lê̆, ƀok athei dêh char jăh tơmơ̆t jên jang hrơ̆ch. Ƀok Đảng roi tơbăt:

“Kiơ̆ đơ̆ng dôm ‘măng hop akŏm trực tuyến yan âu tơ̆ xăh hăm Anih jang Đảng dêh char, Anih vei lăng kon pơlei, rim anih jang ‘noh ƀơ̆t lăp trong tơley pơih kơmăy ưh kơ gan ‘lơ̆ng. Nhôn tơ̆ tơring ‘meh vă trong tơley kăl kơ athei tơgoăt hơnơ̆ng, ưh kơ đei pơdơh. Ƀơ̆t lăp oei hôp, nhôn athei krao điên thoăi apĭnh dơ̆ng. Tôch kơ hoach jơ năr. ‘Meh dêh char tơmơ̆t jên jang trong tơley hiôk, mạng sơđơ̆ng, vă hop akŏm kŭm ƀônh, pơm hla ar kŭm hrĕnh.”

Trung tá Phạm Việt Hùng, Kơdră vei lăng Viettel Đắk Lắk, roi tơbăt anih jang tŏk bŏk jang hơdai hăm Anih vei lăng kon pơlei dêh char tơlĕch jang lơ trong jang tơplih kơsô̆. Hăm kơmăy kơmŏk pơyua ăn pơm hla ar tơ̆ xăh đĭ hiôk, mă lei yua đơ̆ng tơring să, lơ tơring ‘noh thŭng kơna mạng oei bre nhĕp, kăl kơ tơmơ̆t dơ̆ng jên jang pơm dôm hơnih pơih hơyuh roi tơbăt vă sơđơ̆ng mạng:

“Lơ̆m kơplăh tơmơ̆t hơdai dêh char păng tơlĕch jang bơ̆jang kiơ̆ Tơdrong tơchơ̆t 57, Viettel Đắk Lắk hlôi păng tŏk bŏk pơma tơgŭm ăn Anih vei lăng kon pơlei dêh char bơ̆jang kiơ̆ tôm tong tơdrong tơplih kơsô̆. Hơdai hăm ‘noh, roi tơƀôh păng tơlĕch jang dôm hơnih lăm hôp ưh kơ đei hla ar, hơmet ‘lơ̆ng hơnih hôp trực tuyến păng lăm hôp ‘moi kiơ̆ eOffice.”

Ƀok Bùi Thanh Toàn, Kơdră vei lăng Anih jang Khoa hŏk păng Kơmăy kơmŏk dêh char Đắk Lắk, roi tơbăt Anih jang Đảng dêh char Đắk Lắk hlôi hơmet ăn 300 ti hlak jên vă pơm hơtŏk kơmăy kơmŏk tơplih kơsô̆, hơdai hăm athei rim anih jang dăr hơlen vă tơgŭm dơ̆ng jên mă lăp ăn rim tơring. Hơdai hăm ‘noh, dêh char tơlĕch jang tơdrong jang “Pơtho pơhrăm kơmăy kơsô̆ ăn kon pơlei” jang hơdai hăm anih jang ŭnh điên, viễn thông vei sơđơ̆ng tơley pơih sơđơ̆ng, hơdai hăm pơih dơ̆ng lăm pơhrăm tơdrong gơh băt kơsô̆ ăn khŭl bơngai jang teh đak tơ̆ tơring.

“Anih jang Khoa hŏk păng Kơmăy kơmŏk hlôi bơ̆jang hăm dôm anih mơdro sa viễn thông păng pơđĭ hăm anih jang ŭnh điên vă vei sơđơ̆ng pơtruh ŭnh điên ăn dôm hơnih pơih hơyuh. Găh trong tơley tŏk bŏk bre nhĕp yua đơ̆ng ƀơm truh trong tơley kơsô̆ joăt yua, ‘noh dang ei pơđĭ Viettel păng VNPT Đắk Lắk tŏk bŏk akŏm hơdrin hơmet pơ ‘lơ̆ng. Hơdai hăm hơmet pơ ‘lơ̆ng trong tơley, tơdrong pơm hơtŏk dôm kơmăy jang hơtuch kŭm tôch kơ gĭt kăl păng rim tơring tŏk bŏk bơ̆jang. Tơdrong ‘nâu ‘noh pơđĭ tơ̆ dêh char, xăh, phường păng rim anih jang tŏk bŏk tơlĕch jang hơdrin vă hơmet pơ ‘lơ̆ng.”

Đắk Lắk tŏk bŏk dơ̆ng tơ̆ hơnăp ‘meh vă kăl găh tơplih kơsô̆ đơ̆ng rŏng tơmơ̆t hơdai vă pơvih ăn kon pơlei ‘lơ̆ng hloh. Tơdrong tơring pơ̆n tơmơ̆t jên jang kơhrĕng ti hlak jên pơm hơtŏk kơmăy kơmŏk kơsô̆, hơdai hăm tŭn pran pơtho tơdrong gơh yua kloh klĕch kơmăy kơmŏk ăn khŭl jang teh đak tơ̆ tơring ăn ƀôh đon pơ hnŏng tih đơ̆ng pơđĭ khŭl jang chĭnh trĭ, Ƀơ̆t anih jang kăl đei hơmet tôm, gơh jang đơ̆ng bơngai jang teh đak đei hơtŏk ‘lơ̆ng, kŭm nhen hlôh vao đơ̆ng kon pơlei lơ̆m kơplih kơsô̆, tơdrong pơjing jơnei “Khŭl kơdră chĕp kơ̆l kơsô̆” tơring bri kông Tây Nguyên ‘noh hơnih truh ưh kơ tăih bơih.