Đơ̆ng rŏng kơ hơgrop, Jơnŭm tơm  kơ dôm jơnŭm jang tơbôl dêh char Đăk Lăk hlôi keh đang jơnŭm jang, dang ei đei 9 khul vang jang. Atŭm hăm pơtoi dôm tơdrong jang tơbôl, Jơnŭm jang sơkơ̆t hơdah tơdrong tơm lơ̆m jăl jang 'nao noh pơih tơdrong jang tơbôl apŭng plenh teh, kơchăng jang hơdoi, hơvơn tơdrong tơgŭm trŏ ƀlep hăm tơdrong kăl hơtŏk tơ-iung kơ dêh char păng hơtŏk jang đei jơnei kơ khul vang jang. Khei năr ou ki, rim khul jang hlôi pơtoi tơdrong hơpeh hơpong kon pơlei hăm teh đak Lào, Campuchia, Nhật Bản, Hàn Quốc, Ấn Độ păng lơ jơnŭm jang nai.

Dôm tơdrong jang ou tơgop hơtŏk hlôh vao, jang tơbôl đơ̆ng kon pơlei Đăk Lăk, Phú Yên hăm dôm teh đak; lơ̆m noh, jang tơbôl hăm dêh char Mondulkiri kơ teh đak Campuchia tơgop pơjing tơring sơlam rơngei hiôk hian, tơbôl. Sơnăm ou, jơnŭm jang hlôi jang hơdoi pơm kiơ̆, asong đei 8 tơnô̆ jên tơgŭm tenh kuăng đơ̆ng rŏng kơ 'mi kial đak hơbông iŏk đơ̆ng dôm jơnŭm jang phi chĭnh phuh đơ̆ng teh đak đe, hăm kơsô̆ jên đei hloh 56 tih hlj.