VOV4.Bahnar – Hăm hơnăn “Hơvơn axong jang hơtŏk tơ iung kơjăp choh jang xa pơm tơlĕch tơmam drăm akŏm, tơguăt hăm pơm tơlĕch, tĕch tơlĕch tơmam drăm”, Hop akŏm Hơtŏk Axong choh jang xa dêh char Đăk Lăk xơnăm 2022 pơgơ̆r ăh năr 28/4/2022 tơ̆ plei tơm Buôn Ma Thuột, dêh char Đăk Lăk. Hop akŏm đei tơdrong vang akŏm đơ̆ng Anih tơm Choh jang xa păng Hơtŏk tơring tơrang atŭm hăm dôm Anih tơm, anih jang Trung ương; Kơdră jang tang măt ăn 15 teh đak, dôm khul tơmoi đơ̆ng teh đak đe; Kơdră Anih vei lăng kon pơlei, Anih Choh jang xa păng Hơtŏk tơring tơrang, Anih Axong jang kơ 25 dêh char, plei tơm; hloh 200 'nu tang măt ăn dôm anih jang pơm tơlĕch tơmam drăm, anih jang mŭk drăm, anih axong jang lơ̆m păng 'nguaih kơ teh đak, dôm anih jang tĕch pơdro điê̆n tưh pran lơ̆m teh đak... Tơ̆ hop akŏm âu, dêh char Đăk Lăk tơbang 109 tơdrong axong jang, tơdrong jang hơvơn axong jang đei choh pơtăm, choh jang xa tơguăt hăm tơmang pơhiơ̆ cham char, tơguăt choh jang xa kiơ̆ pơkăp kơjăp xơđơ̆ng...

Hop akŏm Axong choh pơtăm dêh char Đăk Lăk xơnăm 2022 jing tơdrong kăp gĭt, jing 'măng vă dêh char Đăk Lăk tơbang tơdrong đei ƀôh, mŭk drăm, tơdrong pran, tơring teh vă hơtŏk găh choh pơtăm, pơm tơlĕch tơmam xa đơ̆ng ka hơdang, yak hadoi, adrin hơmet pơ 'lơ̆ng cham char axong jang, tĕch pơdro, tơgŭm hơ 'nhăk ăn dôm anih axong jang dôm um ai găh Đăk Lăk pơdrŏng mŭk drăm hơtŏk tơ iung păng jing anih truh pơm jang xơđơ̆ng tơnăp.

Lan chih păng pơre nơ̆r