Xơnăm hŏk âu, hnam trưng THCS Võ Thị Sáu tơ̆ xăh Krông Na, apŭng Buôn Đôn đei 349 'nu hŏk tro, lơ̆m noh đei 80% 'nu oh kon kông. Kơyuơ mŭk drăm tơnap tap, lơ mĕ ƀă hŏk tro athei kon hơ-ioh pơdơh kơ hŏk oei tơ̆ hnam jang mir tơgŭm unh hnam.

Oh Y Jun Su Byă, hŏk lăm 9B, Hnam trưng THCS Võ Thị Sáu, apŭng Buôn Đôn, dêh char Đăk Lăk ăn tơbăt: “Mŭk drăm unh hnam tơnap tap noh inh athei pơdơh hŏk lơ 'năr vă năm jang. Đơ̆ng rŏng kơ noh đei thâi kô năm hơvơn inh adrin năm hŏk mă tôm 'năr”

Adoi nhen noh, tơ̆ hnam trưng jăl kơđeh Y Jút, xăh Krông Na, apŭng Buôn Đôn, vă pơtoi kơsô̆ hŏk tro năm hŏk tơ̆ lăm adoi ưh kơ ƀônh ôh. Ƀok thâi Nguyễn Tiến Chung, pơtho tơ̆ Hnam trưng jăl kơđeh Y Jút ăn tơbăt, tơdrong chă hơvơn đe hŏk tro năm hŏk jing minh lơ̆m dôm tơdrong jang kăp gĭt yak hadoi hăm tơdrong pơtho pơhrăm. Ăh mă đei hŏk tro pơdơh kơ hŏk, bơngai pơtho chuh nhĭm lăm jang hadoi hăm jơnŭm pơgơ̆r hnam trưng truh tơƀơ̆p kơtă hăm đe mĕ ƀă păng hŏk tro vă băt hơdăh tôm tơdrong hơpơi 'moih păng hơvơn đe oh năm hŏk tơ̆ hnam trưng dơ̆ng: “Kiơ̆ tơdrong tơroi tơbăt ăh khei năr blŭng noh đe oh năm hŏk xơđơ̆ng, mă lei đunh kơ noh đei minh ƀar năr ưh đei năm hŏk noh nhôn năm hơvơn dơ̆ng. Khei năr yơ đe oh pơdơh lơ hloh noh năm hơvơn hơdrăp dơ̆ng”

Kiơ̆ kô pơtho Trần Thị Hằng, Phŏ kơdră Hnam trưng jăl kơđeh Y Jút, xăh Krông Na, apŭng Buôn Đôn, tơdrong jang tơnap tap hloh ưh kơsĭ pơtho pơhrăm ôh mă pơtoi kơsô̆ đe hŏk tro hŏk tơ̆ lăm. 'Năr hmă noh tơnap bơih, truh ăh khei 11, khei 12 oei tơnap hloh ăh pơyan pĕ ka phê, đe oh pơdơh hŏk vă kiơ̆ mĕ ƀă năm pĕ ka phê iŏk jên hơpăh. Đe thâi kô athei chă apinh hơlen, măng năr năm truht ơ̆ mir tơchă đe hŏk tro: “Hơvơn đe hŏk tro noh athei ăh kơmăng, pơhlom đơ̆ng 7 jơ minh puơ̆t truh 8 jơ noh mă đei tơƀơ̆p unh hnam. Kon hơ-ioh phưo phŏ oei hăm mĕ ƀă tơ̆ mir hloi noh nhôn athei năm truh tơ̆ mir. Ƀok thâi kơdră hnam trưng, phŏ kơdră hnam trưng, kơdră kŏng đoan, đô̆i, bơngai chuh nhĭm lăm athei năm hadoi truh tơ̆ mir vă hơvơn đe hŏk tro năm hŏk tơ̆ hnam trưng”.

Hrat hrĭn thoi ăi, mă lei ăh đe oh vih hŏk tơ̆ lăm, đe thâi kô hơ iă, xơnêp đon. Kơlih đe thâi kô băt hăm dôm tơring teh hin dơnuh tơnap tap nhen tơ̆ tơring xơlam teh Buôn Đôn, 'meh pơm jang vă klaih đơ̆ng hin dơnuh pă đei trong jang yơ hloh kơ hŏk pơhrăm, đei tơdrong hlôh vao noh gô tơplih pơ-'lơ̆ng tơdrong erih. Duch pơtho Phạm Thị Loan, Phŏ kơdră hnam trưng THCS Võ Thị Sáu, xăh Krông Na, apŭng Buôn Đôn tơroi: “Tơdrong mŭk drăm tơ̆ pơlei pơla bơ̆n, xăh bơ̆n noh tơnap tap, teh ưh kơ giơ̆ng, mă tơm noh gơnơm lơ̆m pơyan 'mi vă gơh rei pơtăm mă lei pĕ yua noh adoi gơnơm lơ̆m hơyuh tô̆ 'mi. Thoi noh dang ei đe mon athei đei chư noh ning nai kơnh pơtơm tơgŭm ăn đe mon đei tơdrong erih tơnăp hloh”.

Atŭm hăm tơdrong hơvơn hŏk tro năm hŏk tơ̆ hnam trưng, rim hnam trưng hŏk tơ̆ tơring xơlam teh Krông Na, apŭng Buôn Đôn hlôi hơvơn lơ anih jang lơ̆m tơpôl vă tơgŭm ăn đe hŏk tro hin dơnuh găh hla bar hŏk, tơmam drăm hŏk pơhrăm, gre vih vơ̆t âu to. Gơnơm đei tơdrong tơgŭm găh mŭk drăm păng hơlêm găh đon bơnôh, lơ hŏk tro tơ̆ tơring xơlam teh pơtoi đei năm hŏk pơhrăm tơ̆ hnam trưng.