Hòa Thịnh - tơring đei hiong răm dêh hloh lơ̆m ‘mi kial đak lơ̆p tôch kơ dêh khei 11 sơnăm sơ̆, dang ei tŏk bŏk hăt hot hơmet ăn tang găn ‘mi kial pơrăm. Hơdai hăm dôm hnam ‘nao đei tơ̆ng kơ jung, đei man đơ̆ng "Tơdrong jang Quang Trung", 13 tŏ hnam tang găn ‘mi tih đak lơ̆p tơpôl tŏk bŏk đei pơm. Kiơ̆ kơ ƀok Phương Văn Lành, Bí thư Đảng ủy tơring Hòa Thịnh, hăm 13 tŏ hnam tơjră đak lơ̆p, 1 pôm hnam kĕ ăn oei dang 200 ‘nu, tơring gơh sơđơ̆ng jơhngơ̆m lơ̆m tơdrong tơchă hơnih veh ver sơđơ̆ng ăn kon pơlei mưh ‘mi tih đak tŏk kơjung. Tơdrong jang hơmet ăn bơngai jang păng pơhrăm tơdrong gơh dŏng tơgŭm kŭm đei bơ̆jang kiơ̆:

"Tơring Hòa Thịnh tŏk bŏk akŏm tôch kơ lơ trong jang vă iung tơjră, tang găn ‘mi kial hơbŭt hơbông pơrăm lơ̆m pơyan ‘mi kial truh ou kơnh. Mă kăl, tơring ou ki hlôi tơlĕch iung jang ming man 13 pơbŭng hnam veh ver đak lơ̆p ăn kon pơlei. Tơring jei hlôi iung jang hơdoi hăm Hơnih bơ̆ jang kơpal tang găn hơlou ‘Mi kial pơrăm pơgơ̆r pơtho pơhrăm dôm trong jang tang găn hơlou ‘mi kial hơbŭt hơbông pơrăm ăn kon pơlei; adoi chă răt thŏng nan kmăi păng ao đông ăn rim pơlei. ‘Ngoăih kơ ‘noh, tơring jei hlôi sơng iok đei rim Ca nô vă pơvih pơvăn ăn bơ̆ jang iung tơjră tang găn ‘mi kial pơrăm."

Tơtil hăm Hòa Thịnh, tơring Hòa Mỹ oei jei jing tơring hơnơ̆ng răm kơ ‘mi kial hơbŭt hơbông pơjoă. Trong ƀôh hơdăh mơsuơ̆l mơsoăl lơ̆m bơ̆ jang tơjră tang găn ‘mi kial pơrăm tơ̆ tơring lơ̆m ‘măng ‘mi kial hơbŭt hơbông pơrăm kơtang hloh ƀơ̆t hơtuch sơnăm sơ̆ đei tơring hơlen kơchăng kơtang. Ƀok Nguyễn Hữu Thuận, Bí thư Đảng tơring Hoà Mỹ, dêh char Đắk Lắk tơbăt:

"Nhôn jei hlôi proh hơmet tơmam drăm ăn mĭnh pơlei mĭnh tong thŏng nan kmăi vă iung jang tơdrong jang dŏng tơgŭm kơtă. Minh pơlei lơ loh gô đei mĭnh khul iung jang dŏng tơgŭm kơ yuơ khul hơdruh tơdăm, kon pơlei choh jang sa vei lăng."

Pơyan ‘mi sơnăm 2026, rim hơnih bơ̆ jang kơ dêh char Đắk Lắk hlôi tơlĕch trong jang, kơchăng ăn hloh 24.000 ‘nu kang ƀô̆, ƀô̆ đô̆i atŭm hăm dang 35.000 gre, kmăi kmŏk vă iung jang yông, dŏng tơgŭm păng hơmet pơ ‘lơ̆ng đơ̆ng ‘mi kial pơrăm. Trung tá Phạm Thành Long, Kơ iĕng Kơdră chĕp pơgơ̆r Hơnih chĕp pơgơ̆r tang găn hơlou tơring 6 kơ Hơnih Ƀô̆ đô̆i dêh char Đắk Lắk tơbăt:

"Pơgơ̆r chă ƀơk ăn tơmam drăm, gre tơgŭm dŏng truh tơ̆ 18 Hơnih chĕp pơgơ̆r tơring sơđơ̆ng tôm tơmam drăm ăn rim hơnih păng khul iung jang. Lơ̆m ou, lăng kơjăp găh khul jang ăn rim tơring đei tơdrong hơmơt răm kơtang, hơnơ̆ng ngăl răm đơ̆ng ‘mi kial hơbŭt hơbông pơrăm."