Hơlen lăng găh tơdrong jang kiơ̆ hơnăp jang sơnăm 2022, dôm bơngai tang măt akhan, um rup mŭk drăm - tơpôl lơ̆m dêh char Dak Lak sơnăm ‘nâu đei lơ hơnih hơdăh ‘lơ̆ng. Mă lei, tơlĕch jên tơmơ̆t jang kơ teh đak tŏ sĕt dêh (lăp iŏk đei 29,5%), kiơ̆ hơdai ‘noh jĭ tơdrong jang kiơ̆ hơmet ming tơmơ̆t dơ̆ng tơdrong jang lơ ‘măng, dôm tơdrong jang tam mă vei sơ đơ̆ng ‘lơ̆ng hlôi ƀơm ưh kơ ‘lơ̆ng truh đon lui đơ̆ng kon pơlei kŭm nhen tơdrong tơiung ming mŭk drăm đơ̆ng rŏng jĭ covid-19.

Hăm tơdrong jang choh jang sa, dôm bơngai tang măt Jơnŭm pơgơ̆r kon pơlei dêh char Dak Lak athei kăl kơ tơlĕch lơ trong jang, tơdrong tơgŭm hơdăh vă tơgŭm kon pơlei jang chŭn mir hơtŏk tơiung choh jang sa kơmăy kơ mŏk ‘nao, pơm tơdrong jang hơdai kơtă đơ̆ng anih jang mơdro sa păng kon pơlei jang chŭn mir. Hơdai hăm ‘noh dôm bơngai tang măt kŭm tơroi dôm tơdrong tơtŏ đơ̆ng dêh char Dak Lak, nhen tơchă ăn tơdrong jang ăn bơngai jang; pơjing trong jang tơgŭm, trong tơgŭm ăn khŭl kang ƀô̆ tơ̆ tơring; hơtŏk lơ iŏk yua, tơdrong arih sa vă thây kô pơtho sơđơ̆ng jơhngơ̆m bơ̆ jang.