VOV4.Bahnar - Đei lơ tơ mam ‘lơ̆ng, đei yua vă hơ tŏk tơ iung mă lei truh dang ei tơ mang lăng Dak Lak oei ưh kơ iŏk đei jơ nei nhen ‘meh vă. Dêh char Dak Lak tŏk bŏk hơ drin pơ̆ih să jang hơ dai, pơ đĭ hloi lơ̆m dêh char păngdêh char nai vă pơm tơ drong hơ iă ăn tơ mang lăng tơ̆ dêh char hơ tŏk tơ iung.

Quảng Bình jĭ 1 lơ̆m dôm dêh char ‘nao jang hơ dai tơ mang lăng hăm Dak Lak yua đơ̆ng dôm tơ drong vă lei lăi găh cham char bri brăh. Tơ jê̆ âu, 2 dêh char hlôi pơ ma dơ nuh lơ tơ drong găh tơ chĕng hơ len anih tĕch mơ dro, pơ̆ih trong păr Đồng Hới – Buôn Ma Thuột păng lơ tơ drong jang hơ dai nai lơ̆m 5 sơ năm truh. Ƀok Đặng Đông Hà, Phŏ Kơ dră Anih vei lăng găh Tơ mang lăng Quảng Bình akhan, Dak Lak păng Quảng Bình vang đei hơ mĕng hơ tŏk tơ iung rơ goh, pơ dơh ngôi, mă lei kŭm đei lơ tơ drong hơ drô̆ vă jang tŏk, tơ iung jing dôm hơ năn tơ mang lăng đei kơ jă kăp gĭt:

        “Kŭm hăm pơ jing tơ mam tơ mang lăng ‘noh tŭn pran tơ drong jang roi tơ ƀôh păng jang hơ dai. Dang ei ‘noh tơ drong tơ plih kơ sô̆ ‘noh roi tơ ƀôh, jang hơ dai, marketing sư tôch kơ gĭt kăl. Păng tơ drong hơ tuch dơ̆ng ‘noh jĭ dôm anih jang mơ dro sa kŭm kơ chăng păng dôm anih jang vei lăng teh đak kŭm hơ tŏk loi dơ̆ng tơ drong jang vei lăng teh đak đơ̆ng kơ dih vă vei lăng ‘lơ̆ng dôm tơ mam tơ mang lăng hai, hơ dai hăm kŭm pơm tơ drong hiôk ăn rim anih jang mơ dro sa vă hơ tŏk tơ iung tơ mang ‘lơ̆ng hloh”.

Dak Lak kĭ pơ kăp tơ drong jang drơ̆ng nơ̆r jang hơ dai hơ tŏk tơ iung tơ mang lăng hăm lơ dêh char, pơ lei tơm

            Hơ drol ‘noh, lơ̆m khei 3/2022, Anih vei lăng găh Joh ayŏ - Tơ plŏng kơ dâu păng Tơ mang lăng dêh char Dak Lak kŭm hlôi jang hơ dai hăm Anih vei lăng găh Tơ mang lăng dêh char Khánh Hòa pơ gơ̆r Pơ ma đam pơ trŭt jang, roi tơ ƀôh păng jang hơ dai tơ mam tơ mang lăng. Yă Nguyễn Thị Lệ Thanh, Kơ dră Anih vei lăng găh tơ mang lăng dêh char Khánh Hòa tơ băt: pơ đĭ 2 dêh char tă kơ đei tơ drong ‘lơ̆ng hơ iă vă hơ tŏk tơ iung dôm tơ mam tơ mang lăng, tơ dăh nhen Khánh Hòa đei tơ drong pran găh tơ mang lăng achon đak dơ sĭ ‘noh Dak Lak đei tơ mang lăng cham char bri brăh tôch kơ ‘lơ̆ng. ‘Nâu jĭ tơ drong tơ gŭm băl tôch kơ ‘lơ̆ng ăn pơ đĭ 2 dêh char, pơ jing dôm tour găh tơ mam tơ mang lăng hăm dôm tơ drong chă năm lăng hơ iă ăn tơ moi.

        “Nhôn gô athei rim kŏng ti jang tơ mang lăng kŭm nhen jang hơ dai hăm Khŭl jang găh tơ mang lăng Nha Trang – Khánh Hòa hơ nơ̆ng jang hơ dai vă jang kiơ̆ tơ lĕch jang hơ dai, pơ ma dơ nuh hơ nơ̆ng, đei tơ drong jang pơ tôch vă hơ len lăng hlôh vao, jang băt. Kiơ̆ lơ̆m noh Anih jang tơ mang lăng kŭm gô akŏm nơ̆r tơ gop păng đei dôm tơ drong tơ lĕch jang đơ̆ng rŏng vă kơ iŏk yua hloh hơ năp jang hơ tŏk tơ iung jang hơ dai tơ ring đơ̆ng Khánh Hòa păng Dak Lak”.

Dak Lak đei hơ nih cham char bri brăh ‘lơ̆ng

Kŭm hăm tơ drong pran đơ̆ng cham char bri brăh, Dak Lak oei tơ̆ anih kơ drơ̆m tơ ring Tây Nguyên, hiôk vă jang tơ dai tơ mang lăng hăm dôm dêh char lơ̆m tơ ring, mă loi ‘noh jĭ rông ƀôt Lâm Đồng, tơ ring hlôi pơ jing đei hơ năn tơ mang lăng mă đe ư hơ nhang. Yă Nguyễn Thị Bích Ngọc, Phŏ Kơ dră Anih vei lăng găh Joh ayŏ- Tơ plŏng kơ dâu păng Tơ mang lăng Lâm Đồng tơ băt, 2 dêh char tŏk bŏk hơ drin hơ met pơ ‘lơ̆ng dôm tơ drong pơ găn găh trong nơ năm, vă tơ mang lăng tơ pă đei jang hơ dai:

        “Hrei ‘nâu năm đơ̆ng Lâm Đồng truh tơ̆ Dak Lak dang vă jê̆ 200km, trong năm tôch kơ mơ mat tat. 2 tơ ring tŏk bŏk tơ lĕch tơ drong jang pơm trong gre kơ dâu hrĕnh đơ̆ng Lâm Đồng klĕch tơ̆ Dak Lak, đơ̆ng noh tơ ƀưh hăm dôm dêh char Tây Nguyên. Păng tôch kơ ‘meh ‘noh jăh hơ met ming păng pơm ming, hơ dai hăm man ‘nao trong nơ năm, pơm tơ drong hiôk ‘lơ̆ng hloh ăn tơ moi tơ mang lăng truh hăm 5 dêh char Tây Nguyên. Mĭnh tơ drong dơ̆ng ‘noh jĭ pơ jing 1 tơ drong hơ găt drơ̆ng 1 nơ̆r găh tơ mang lăng ‘lơ̆ng, hơ dai hăm pơ jing hloi tơ drong hơ găt vă hơ len lăng dôm tơ drong jang tơ mang lăng đơ̆ng kơ dih”.

Kiơ̆ kơ ƀok Đặng Gia Duẩn, Phŏ Kơ dră Anih vei lăng găh Joh ayŏ - Tơ plŏng kơ dâu păng Tơ mang lăng Dak Lak, hăm 49 hơ drĕch hơ drŭng tŏk bŏk arih sa tơ̆ dêh char, Dak Lak đei 1 tơ drong joh ayŏ lơ kơ loăi păng tôch kơ kơ hơ iă. Khei ‘năr âu ki, dêh char hlôi đei lơ tơ drong jang hơ dăh ƀơm truh hơ tŏk tơ iung tơ mang lăng, vei răk păng hơ tŏk kơ jă kăp gĭt dôm anih gru groa jơ hnơr arih kŭm nhen Tơ drong tơ chơ̆t găh vei răk tơ drong tôn chĭng chêng. Hop akŏm Đảng ‘măng mă 17 kơ dêh char kŭm hlôi băt hơ dăh hơ tŏk tơ iung tơ mang lăng ‘noh jĭ 1 lơ̆m dôm hơ năp jang tơm. ‘Nâu jĭ dôm trong jang ‘lơ̆ng vă tơ klep hơ tŏk tơ iung joh ayŏ hăm hơ tŏk tơ iung tơ mang lăng tơ̆ dêh char. Ƀok Đặng Gia Duẩn pơ ma:

        “Nhôn gô hơ drin jang kiơ̆ dôm tơ drong tơ gŭm hơ drol, dôm tơ drong jang hơ yơ, dôm hơ nih hơ yơ kĕ hơ tŏk ‘lơ̆ng mă krao ‘noh jĭ sơng đei tơ moi tơ mang lăng ‘noh gô tơ gŭm hơ drol tơ mơ̆t jên jang, sơng đei roi ‘năr roi lơ hloh tơ moi tơ mang lăng păng lơ jên, tơ mam tơ mơ̆t jang lơ̆m dêh char ‘moi kiơ̆ dôm tơ drong jang ‘noh. Oei Dak Lak pha hăm dôm tơ ring nai tơ̆ tơ drong kiơ? Trŏ bơ̆ih sư athei jing tơ drong hơ iă joh ayŏ kơ kon pơ lei dôm hơ drĕch hơ drŭng lơ̆m dêh char, lơ̆m noh đei lơ dôm hơ drĕch kon kông kơ tă anih đei tơ drong joăt oei sa ‘lơ̆ng hơ iă păng hơ dai hăm hơ tŏk tơ iung tơ mang lăng, vă kơ nhôn ‘meh vă tơ drong jên iŏk đơ̆ng hơ tŏk tơ iung tơ mang lăng, sư gô tơ gop gĭt kăl lơ̆m tơ drong GDP kơ dêh char tơ̆ hơ năp kơnh”.

Tơ drong joh ayŏ đei lơ đơ̆ng dôm hơ drĕch kon kông kơ tă anih

Hăm lơ tơ drong đei yua tơ mam ‘lơ̆ng vă hơ tŏk tơ iung lơ kơ loăi tơ mang lăng, Dak Lak tŏk bŏk đei dôm hơ yak năm vă iŏk jang păng hơ tŏk tơ iung tơ mang lăng 1 trong pran. Lơ̆m noh tơ drong tŭn pran jang hơ dai hăm dôm dêh char, pơ lei tơm jơ̆p lơ̆m teh đak đei hơ mĕng gô pơm tơ drong hơ iă ăn tơ mang lăng, tơ gŭm anih jang kơ măy kơ mŏk ưh kơ đei ‘nhui kĕ pơm đei lơ kơ jă kăp gĭt hloh ăn tơ drong hơ tŏk tơ iung mŭk drăm, tơ pôl tơ̆ tơ ring.

H’Xíu: Chih

Thuem: Tơ blơ̆