Kiơ̆ tơdrong kĭ pơkăp, dôm pang gô jang hơdai tơlĕch jang lơ tơdrong jang tơm nhen hơtŏk tơiung kơmăy kơsô̆, tơdrong vei lăng păng kơsô̆ chih răk anih jang pơtho pơhrăm; iŏk yua kơmăy hơgei (AI), kơsô̆ chih răk tih (Big Data) lơ̆m vei lăng, pơtho pơhrăm; hơtŏk tơiung hŏk kơsô̆, pơtho hŏk trực tuyến, tơdrong jang pơtho pơhrăm hơgei. Hloh 350 kang ƀô̆, thây kô pơtho tơm tơ̆ Đắk Lắk hlôi pơhrăm găh AI păng tơblang kơsô̆ chih răk; hloh 1.500 thây kô pơtho, hŏk tro đei roi tơbăt găh tơdrong joăt pơma sa ‘lơ̆ng păng tơplih kơsô̆ lơ̆m hnam trưng hŏk.

Kiơ̆ kơ ƀok Lưu Tiến Quang, Phŏ Kơdră Anih vei lăng găh Pơtho pơhrăm dêh char Đắk Lắk, tơdrong kĭ pơkăp jang hơdai vă hơtŏk tơdrong pran đơ̆ng dôm pang, pơtrŭt tơplih kơsô̆ tôm tong lơ̆m anih jang pơtho pơhrăm, tơgop bơ̆jang kiơ̆ ‘lơ̆ng tơdrong jang vei lăng, pơjing hơnih pơtho pơhrăm kơsô̆, pơm lăp hăm ‘meh vă  tơplih ‘nao pơtho pơhrăm lơ̆m khei ‘năr hrei ‘nâu.