Kơsơ̆ 24/5, tơ̆ anih bơ̆ jang Khŭl kơdră teh đak, Jơnŭm roi tơƀôh asong ăn brŏk đơ̆ng hnam pơnă hrôih hlôi hop akŏm set hơlen, kĭ ăn hơnăn athei Kơdră teh đak asong ăn hơchăng pơnă hơdrol kơ khei ‘năr pơkăp ăn kơ dôm bơngai pơnă đei tôm tơdrong kăl gơh asong ăn brŏk đơ̆ng hnam pơnă hrôih ƀlep ƀơ̆t tơbăt 51 sơnăm Rơngei tơring pơbăh, jơnei teh đak (30/4/2026), kơkuh chơt hơiă jơnei Hop akŏm bơngai tang măt lơ̆m teh đak ‘măng mă XIV kơ Đảng, pôk rơih bơngai tang măt Quốc Hội jăl XVI păng pôk rơih bơngai tang măt Jơnŭm pơgơ̆r kon pơlei rim jăl, jăl jang 2026-2031. Pơma tơ̆ ‘măng hop akŏm, Phŏ Thủ tướng Phạm Gia Túc tơroi rơđăh, ‘mêm mơnat păng tơgŭm pơm hơ iơch tơdrong yoch hăm bơngai pơm glăi ‘noh jĭ tơdrong joăt joe ‘lơ̆ng hơiă đơ̆ng hơdrĕch hơdrŭng bơ̆n.

Jơnŭm roi tơƀôh asong ăn brŏk đơ̆ng hnam pơnă hrôih sơnăm 2026 hlôi hơlen lăng hloh 10.000 hô sơ bơngai pơnă đei tôm tơdrong kăl vă athei brŏk đơ̆ng hnam pơnă hrôih. Phŏ Thủ tướng Phạm Gia Túc athei kơplăh set kĭ ăn athei kơjăp, ‘lơ̆ng tơpăt păng trŏ khôi luơ̆t. Kiơ̆ kơ Jơnŭm roi tơƀôh asong ăn brŏk đơ̆ng hnam pơnă hrôih, vă tơdrong jang asong ăn brŏk đơ̆ng hnam pơnă hrôih sơnăm 2026 iŏk đei jơnei ‘lơ̆ng, rim kơdră, rim anih jang, rim tơring kăl kơ bơngơ̆t truh tơdrong mơ̆t oei hơdai dơ̆ng hăm tơpôl ăn bơngai đei asong ăn brŏk đơ̆ng hnam pơnă hrôih vih tơ̆ tơring, akŏm tŭn pran roi tơbăt, hơtŏk ‘lơ̆ng hlôh vao păng hơnăp jang đơ̆ng rim kơdră đảng, khŭl kơdră tơring, rim anih jang chĭnh trĭ - tơpôl, khŭl grŭp păng tơpôl kon pơlei, ‘nĕ kơ hơreh, vang tơgŭm bơngai đei asong ăn brŏk hrôih đơ̆ng hnam pơnă hŭt lê̆ tơdrong kơdơ̆ mơlâu.