Hop akŏm đei pơ gơ̆r đơ̆ng rŏng dôm tơdrong ưh kơ ‘lơ̆ng, tơgar băl păng jâu ưh kơ gan tơ păt, mă anih jang mơ dro sa tĕch tơ lĕch tơ̆ teh đak đe tơ mam ‘nâu tơ̆ Dak Lak tơ vŏk ƀơm lăp đơ̆ng rŏng kơ dôm tơ mam sầu riêng mă blŭng đei tĕch tơ lĕch tơ̆ teh đak đe kiơ̆ trong tơm. Kiơ̆ kơtơ̆ng ang hop akŏm, truh dang ei Dak Lak hlôi pơtăm đei hloh 15.200 hek tar sầu riêng, tŏk 13.000 hek tar pơtêng hăm sơnăm 2015. Tơmam sơnăm 2022 iŏk đei hloh 150 rơ bâu tấn, păng tơchĕng hơdrol gô tŏk truh 300.000 tấn lơ̆m sơnăm 2025.

Hơnih mong răk tơmam kơ anih jang mơdro sầu riêng tơ̆ Dak Lak

Găh tĕch tơlĕch tơ̆ teh đak đe, sơnăm 2022 jĭ sơnăm mă blŭng sầu riêng Dak Lak kŭm nhen lơ̆m teh đak, đei tĕch tơlĕch kiơ̆ trong tơm tơ̆ anih tĕch mơ dro Trung Quốc, anih răt iŏk 99% tơmam sầu riêng lơ̆m apŭng plĕnh teh. Vă hơmet pơ ‘lơ̆ng tôch ai dôm tơdrong tơhlăk tơhlĭn lơ̆m jang hơ dai hơtŏk tơiung tơdrong jang tơmam sầu riêng, hơtŏk ‘lơ̆ng kơ sư̆k pơ jei lơ̆m tĕch tơ lĕch tơ̆ teh đak đe, Kơdră chĕp kơ̆l Anih vei lăng kon pơlei dêh char Dak Lak athei dôm anih jang ƀơm truh hơtŏk ‘lơ̆ng vei lăng, jang hơdai kơ jăp păng hơmet ‘lơ̆ng tơtom dôm tơdrong đei ƀôh, pơtrŭt pơ jing khŭl jang sầu riêng vă jang ‘lơ̆ng tơdrong jang tơ mam ‘lơ̆ng ‘nâu.