VOV4.Bahnar - ‘Măng pơlong lĕch ‘măng khoă jăl pêng tŏk bŏk vă jê̆ truh, dơnŏ anĭh vei lăng Hnam trương pơtho pơhrăm Dak Lăk tŏk bŏk hơdrin ăn ‘măng pơlong sơđơ̆ng, tơpăt păng sơđơ̆ng ư̆h kơ lê̆ hŏk tro ayơ kơ yuơ ŭnh hnam tơnap tap mă ư̆h kơ đei vang năm pơlong.

Jơ hŏk pơhrăm ming kơ hŏk tro lăm 12 Hnam trương Jăl pêng Nguyễn Bình Khiêm, apŭng Krông Pach, dêh char Dak Lăk

Sơnăm au, Dak Lăk đei hlŏh 20.400 ‘nu hŏk tro chĭh hơnăn vang pơlong; lơ̆m au đei hlŏh 19.500 ‘nu hŏk tro tŏk bŏk hŏk lăm 12 hnam trương jăl pêng păng Giáo dục thường xuyên, pă dôm yơ ‘nŏh hŏk tro găh ‘ngoăih. Vă hơmet ‘lơ̆ng ăn ‘Măng pơlong, dêh char gô pơgơ̆r 32 hơnĭh pơlong hăm 869 lăm pơlong tơ̆ rim hnam trương jăl pêng tơ̆ 15 apŭng, thĭ xăh, pơlei tơm. ‘Moi kiơ̆ rim tơdrong tơplĭh găh ‘Măng pơlong sơnăm 2022 hlôi đei tơbăt hơdăh, Dơnŏ anĭh vei lăng Hnam trương pơtho pơhrăm Dak Lăk hlôi pơrô̆ athei rim hnam trương jang keh đang trong pơ prŏ sơnăm hŏk ƀlep khei ‘năr pơtho ming ăn hŏk tro. ‘Ngoăih kơ ‘nŏh, iung jang hơdoi hăm rim khŭl ƀok thây kô lơ̆m hnam trương păng ƀok thây kô găh ‘ngoăih vang pơtho tơgŭm ăn hŏk tro hŏk pơhrăm ming, mă kăl hăm rim đe ŏh ŭnh hnam tơnap tap.

Tơblơ̆ nơ̆r: Amazưt