VOV4.Bahnar - Đơ̆ng blŭng sơ năm truh dang ei, tơ drong ưh kơ măh bơ ngai jang hơ gei tơ̆ dôm kŏng ti, anih jang mơ dro sa lơ̆m dêh char Dak Lak đei bôh lơ. Lơ anih jang lăp đei 2,3 hrĕng bơ ngai jang, ƀơ̆t mă ‘meh vă yan âu tôch kơ lơ vă pơm lăp hăm tơ drong jang tŏk truh kơ rơ bâu ‘nu bơ ngai jang. Tơ drong ưh kơ măh kơ tang âu hlôi ƀơm ưh kơ ‘lơ̆ng truh tơ drong pơih să pơm tơ lĕch tĕch mơ dro đơ̆ng anih jang.

Lơ khei âu ki, Anih pơm sŏk măt păng chơ choh bơ̆n hơ băn ao Hà Thư, Hơ nih jang kơ măy kơ mŏk Tân An, dêh char Dak Lak ling lang ưh kơ măh bơ ngai jang kơ tang. Yă Nguyễn Thị Trang, tơ ‘ngla anih jang tơ băt, nhôn kăl chă dang 800 ‘nu bơ ngai jang hơ gei, mă lei mă đơ̆ng ‘moi kiơ̆ trong chă rơ̆ih kŭm lăp chă đei dang 200 ‘nu. Ưh kơ măh bơ ngai jang, anih jang jing athei bơ̆ jang păh lăp, ƀơm ưh kơ ‘lơ̆ng tôch kơ tih truh trong tơ lĕch jang tơ iung ming pơm tơ lĕch:

“Mĭnh  kŭm chih tăh lơ̆m dôm trang tơ chă mă lei măt kŏng nhân năm nôp hla ar hô sơ tôch kơ tŏ sĕt. Dôm buăl đei jang hơ gei jang tơ̆ lơ̆m to brŏk pơ dơh jĭ hơ buh ‘noh đe sư năm tơ̆ âu jang ‘noh lăp 1,2 khei ‘noh đe sư năm dơ̆ng tơ̆ Bình Dương, Đồng Nai vă jang, đe sư ưh kơ jang hloi tơ̆ Kŏng ti nhôn. Kŏng nhân tŏk bŏk jang truh pơ yan tiu, pơ yan cheh phe ‘noh đe sư pơ dơh vă năm jang mir, mă vă đĭ đăng rim bơ ngai pơ dơh ‘noh ưh kơ đei bu năm jang hơ lơ̆k dơ̆ng.”

Lei lăi nhen yă Trang, ƀok Nguyễn Kim Tùng – Phŏ kơ dră vei lăng Kŏng ti Tùng Bách tơ băt, Kŏng ti sư kŭm ưh kơ gơh pơih să pơm tơ lĕch, ƀơ̆t lăp tam mă jang đĭ kơ sư̆k dang ei đei đơ̆ng anih jang yua ưh kơ măh bơ ngai jang hơ gei.

“Đơ̆ng blŭng sơ năm truh dang ei Kŏng ti nhôn kăl dang 50 ‘nu bơ ngai jang mă chih tăh dang hloh 10 năr kơ âu, kŭm lơ kênh dêh mă lei kŭm lăp rơ̆ih truh 10 ‘nu. Tơ drong dang ei tŏk bŏk ưh kơ măh bơ ngai jang tôch kơ lơ. Sư ưh kơ măh thoi noh ƀơm ưh kơ ‘lơ̆ng lơ dêh, pơ tih gia nhen anih jang mơ dro sa nhôn kăl pơ̆ih să 1,2 tơ drong jang păng sơ đơ̆ng tơ drong jang so mă lei kŭm ưh kơ pơ̆n pơ̆ih yua ưh kơ măh bơ ngai jang.”

Lơ Anih jang mơ dro sa tơ̆ Dak Lak tŏk bŏk ưh kơ măh bơ ngai jang hơ gei

Kiơ̆ kơ Anih pơ vih pơ văn tơ drong jang dêh char Dak Lak, jô̆ truh jăl khei mă I, sơ năm ‘nâu, đei 674 anih jang mơ dro sa lơ̆m păng ‘ngoăih dêh char pơm hla ar chă bơ ngai jang, hăm ‘meh vă chă dang 30.000 ‘nu jang. Mă lei, 3 khei âu ki, anih jang ‘nao roi tơ ƀôh tơ drong jang vă jê̆ 10.000 ‘nu păng ‘meh vă chă bơ ngai jang đơ̆ng lơ anih jang mơ dro sa lơ̆m tơ ring oei tôch kơ lơ. Ƀok Nguyễn Văn Cường, Phŏ Kơ dră vei lăng Anih jang akhan, găh lơ yua đơ̆ng ƀơm ưh kơ ‘lơ̆ng đơ̆ng jĭ COVID-19 oei kơ tang.

“Lơ bơ ngai jang truh khei ‘năr âu hlôi pơ ma dơ nuh đei hăm bơ ngai chă bơ ngai jang kơ anih jang mơ dro sa ‘moi kiơ̆ roi tơ băt đơ̆ng dôm xăh, phường kŭm nhen dôm ‘măng pơ gơ̆r pơ vih pơ văn tơ drong jang. Mă lei yua đơ̆ng ƀưm ưh kơ ‘lơ̆ng đơ̆ng jĭ hơ buh 1,2 ‘nu bơ ngai jang đe sư oei ưh kơ pơ̆n năm dơ̆ng tơ̆ dôm nih jang kơ măy kơ mŏk yua thoi noh mă ưh kơ măh bơ ngai jang oei tôch lơ.”

 Chih jô̆ đơ̆ng Anih vei lăng kon pơ lei dêh char Dak Lak: Lơ̆m jăl khei mă I sơ năm 2022, đei 227 anih jang mơ dro sa hlôi bơ̆ jang hơ lơ̆k dơ̆ng, tŏk 22,7% pơ têng hăm khei ‘nâu sơ năm 2021. ‘Ngoăih kơ ‘noh, đei 327 anih jang mơ dro sa pơ jing ‘nao, dang 21,8% trong tơ lĕch jang, tŏk 19,78% pơ têng hăm khei ‘nâu kơ sơ năm sơ̆. Mă lei yua đơ̆ng mơ mat tat lơ̆m tơ drong tơ chă bơ ngai jang, mă loi ‘noh jĭ dôm bơ ngai jang hơ gei hlôi pơm ăn dôm Kŏng ti, anih jang mơ dro sa huŏng lơ̆m mơ mat tat. Kiơ̆ kơ ƀok Nguyễn Hoàng Giang, Kơ dră Anih vei lăng bơ ngai jang lĭnh jĭ rơ ka păng tơ pôl dêh char Dak Lak, Anih jang tŏk bŏk hơ drin dar deh vă hơ met pơ ‘lơ̆ng mơ mat lơ̆m tơ drong jang tơ gŭm chă bơ ngai jang păng pơ tho pơ hrăm tơ drong jang ăn bơ ngai jang. Mă lei iŏk yua yak blŭng oei tam mă đei nhen chang gô.

“Anih jang tŏk bŏk hơ drin jang hơ dai hăm dôm anih jang mơ dro sa tơ roi tơ drong kơ tơ̆ng ang, pơm tơ drong hơ iă hăm trong jang tơ gŭm vă sơng đei bơ ngai jang. Oei hăm dôm bơ ngai đei ‘meh vă hŏk tơ drong jang, pơ tho tơ drong jang ‘noh hrei ‘nâu dôm Anih pơ tho pơ hrăm tơ drong jang kơ dêh char kŭm pơm lăp hăm dôm tơ drong ‘meh vă kŭm nhen Anih pơ tho pơ hrăm hơ nơ̆ng kơ dôm apŭng adoi bơ̆ jang kiơ̆ tơ chă bơ ngai hŏk vă pơ tho pơ hrăm lơ tơ drong jang, mă lei truh khei ‘năr dang ei chă rơ̆ih bơ ngai hŏk đei 8,6% đĕch. Vă jê̆ truh kơnh gô hơ nơ̆ng đĭ jơ hngơ̆m vă bơ̆ jang kiơ̆ tơ drong pơ tho pơ hrăm tơ drong jang ăn kơ dôm bơ ngai jang tơ̆ Dak Lak.”

Lơ̆m khei ‘năr dôm anih jang mơ dro sa ưh kơ măh bơ ngai jang hơ gei păng tơ drong ưh kơ măh âu gô ƀơm ưh kơ ‘lơ̆ng kơ tă truh tơ drong tơ iung ming pơm tơ lĕch tĕch mơ dro ‘noh tơ drong tơ lĕch jang dôm trong jang tơ gŭm tơ iung ming anih chă bơ ngai jang vă hơ met pơ ‘lơ̆ng mơ mat tơ tom ăn anih jang mơ dro sa tŏk bŏk kăl hloh.

Nam Trang: Chih

Thuem: Tơ blơ̆