VOV4.Bahnar - Lơ̆m hloh 1 khei âu ki, pham pơ yua ăn kâp kư̆u păng hơ met jĭ tơ̆ dêh char Dak Lak ling lang lơ̆m tơ drong ưh kơ măh yua đơ̆ng pham mong răk tơ̆ dôm anih jang pơ gang đĭ pă đei, ƀơ̆t mă trong tơ lĕch jang sơng iŏk pham plang song oei tam mă đei tơ lĕch jang. Kiơ̆ kơ tơ̆ng ang đơ̆ng Anih pơ gơ̆r krao hơ vơn plang song pham dêh char Dak Lak, lơ̆m khei 3 păng blŭng khei 4, tơ drong pơ truh pham ăn tơ drong jang kâp kư̆u păng hơ met jĭ tơ ƀơ̆p lơ mơ mat tat. Tơ̆ Hnam pơ gang Đa khoa tơ ring Tây Nguyên, rim khei jô̆ păh lăp kăl đơ̆ng 1.800 – 2.000 đơn vị pham vă pơ yua ăn kâp kư̆u păng hơ met jĭ hơ nơ̆ng mă lei âu ki lăp ‘nao pơm lăp đei 1 puăt pham kiơ̆ ‘meh vă.

Ƀok Nguyễn Đức Phú, Chánh văn phòng Anih pơ gơ̆r krao hơ vơn plang song pham dêh char Dak Lak tơ băt: Dang ei, Anih pơ gơ̆r krao hơ vơn plang song pham dêh char hlôi pơm hla ar gơ̆ih ăn anih vei lăng kon pơ lei dêh char athei anih jang pơ gang tơ mơ̆t dơ̆ng tơ tom dôm hoă chơ̆t vă jăh tơ lĕch jang plang song pham tơ gŭm, hơ tŏk kơ sô̆ pham pơ truh ăn rim anih jang pơ gang păng hnam pơ gang lơ̆m dêh char.

Thuem: Tơ blơ̆