VOV4.Bahnar - Rim bơngai iŏk jang tŏk iŏk hơdrol hlŏh 2.000 ti hlak jên kon jên tĕh đak tơmơ̆t jang tơ̆ dêh char Dak Lăk mă lei lơ tơdrong jang tơlĕch jang hiơ hiơ̆ pơm ăn kon jên tŏk iŏk hơdrol hlŏh khei ‘năr pơkă pơdrĕo trŭh vă jê̆ 1.000 ti hlak jên. Iŏk tơvĭh jên, Dak Lăk gô đei rơvơn atŏk lơ kon jên tơlĕch jang tơ̆ rim tơdrong vă jang đei tơlĕch jang ‘lơ̆ng. Mă lei ‘nau jing tơdrong tơnap kơ yuơ lơ hơnĭh mơdro sa tŏk bŏk tơƀơ̆p tơnap tap pơm pơm tơlĕch tĕch mơdro tơmam drăm, kon jên tŏk iŏk hơdrol pơm ăn kon jên hre tơnap mă iŏk tơvĭh đei. Tơdrong anai dơ̆ng, Dơnŏ anĭh vei lăng kon pơlei dêh char jei pơtăm akhan tơdăh iŏk tơvih jên, drơ̆ng kiơ̆ rim tơdrong vă jang tơlĕch jang hiơ hiơ̆, ‘nŏh rŏ năng Trung ương pă đei klăh asong kon jên tơmơ̆t jang.

Ming man trong glung Hồ Chí Minh jăl trong ver găh Hơlĕch pơlei tơi tơm Buôn Ma Thuột, ming man đang lăp jơei 80 ti hlak jên, lơ̆m mă kon jên ăn tŏk iŏk hơdrol đơ̆ng rim tơngla iŏk kang tŏk hlŏh 220 ti hlak jên

Tơdrong vă jang tơmơ̆t jên jang ming man trong Glung Hồ Chí Minh jăl trong ver găh hơlĕch pơlei tơm Buôn Ma Thuột, dêh char Dak Lăk tơlĕch jang đơ̆ng sơnăm 2020-2023 hăm kon jên tơmơ̆t jang 1.509 ti hlak jên, trŭh dang ei hlôi tơlĕch ăn 1.044 ti hlak jên. Mă lei, tơdrong jang ming man tôch hiơ hiơ̆ hăm chă ming man lăp keh đang dang 8%, hơtŏ hăm kơ jă kơ jên ming man lăp hlŏh 80 ti hlak jên. Lơ̆m mă nŏh, kon jên ăn rim hơnih iŏk ming man tŏk iŏk hơdrol ‘nŏh hlŏh 220 ti hlak jên. Ƀok Phan Xuân Bách, Kơ iĕng Kơdră chĕp pơgơ̆r Dơnŏ anĭh vei lăng tơdrong vă jang tơmơ̆t jên jang ming man trong nơnăm păng tơring chŏh jang sa atŏk tơ iung tơring tơrang dêh char Dak Lăk, tơngla tơmơ̆t jên jang tơdrong vă jang tơbăt, mĭnh ƀar ‘nu tơngla iŏk jang tŏk iŏk hơdrol mă lei nhen lĕ ư̆h kơ đei tơlĕch jang, kon jên tŏk iŏk hơdrol hlôi jing “kon jên hre tơnap mă iŏk tơvĭh đei”.

        Mă hơdăh ‘nŏh nhen Kŏng ty Phương Đông, (hơnĭh jang kơsô̆ 47 trong Thái Phiên, pơlei tơm Buôn Ma Thuột)- tơngla iŏk jang tơnô̆ jang ksô̆ 03 găh Tơdrong vă jang hlôi tŏk iŏk hơdrol hlŏh 44 ti hlak jên păng mĭnh hơnĭh mong jên dơ̆ng pang tang măt ăn iŏk hơdrol. Mă lei, kŏng ty au hlôi đei tơdrong sar bar păng măh tơplĭh bơngai tang măt anai. Tơngla tơmơ̆t jên jang hlôi chă athei lơ ‘măng, mă lei hlôi vă jê̆ 1 sơnăm, kŏng ty au ư̆h kơ đei iung jang rim tơnô̆ ăn jang kiơ̆ kĭ pơkăp dĭh băl hơdrol. Tơngla tơmơ̆t jên jang măh pơm hla bơar ƀar ‘măng iŏk tơvĭh kon jên tơmơ̆t jang hlŏh 44 ti hlak jên au đơ̆ng dơnŏ anĭh mong jên dơ̆ng pang tang măt mă lei tim mă xek tơlang keh đang:“Lơ̆m hla bơar pơkăp jang tơchơ̆t rim ‘măng athei pơdrĕo ‘măng mă 1, mă 2, mă 3, mă lei lơ̆m 3 khei ư̆h kơ đei chă pơdrĕo hiă mĭnh hlak ayơ, ‘nŏh jing ư̆h kơ đei chă jang yă kiơ vă kla ăn ming man ‘nŏh kiơ̆ Tơdrong tơchơ̆t 99 sơnăm 2021 ‘nŏh kăl athei pơdreo hloi. Tơdrong mă au ư̆h kơ pơtrŭh ăn kŏng ty kơ yuơ hơnĭh mong jên dơ̆ng pang tang măt, ư̆h kơ băt kơ yuơ kă kiơ hơnĭh mong jên au chă dơ̆ng pang tang măt ăn, kơna dang ei jĭ pơ koĕl athei pơdrĕo hloi. Dang ei tơdrong iŏk tơvĭh đei dăh mă ư̆h ‘nŏh gô chă apĭnh hơlen đơ̆ng păh hơnĭh mong jên au ‘mơ̆i mă băt.”

        Jên tŏk iŏk hơdrol hlŏh khei ‘năr pơkă hlôi jing “kon jên hre tơnap mă iŏk tơvĭh đei” jei jing tơdrong đei ƀô̆h lei lăi tơ̆ rim tơdrong vă jang lơ̆m dêh char Dak Lăk. Kiơ̆ đơ̆ng Dơnŏ anĭh mong jên Tĕh đak dêh char Dak Lăk tơbăt, jô̆ trŭh dang ei, lơ̆m akŏp hlŏh 2.115 ti hlak jên ăn tŏk iŏk hơdrol ‘nŏh đei trŭh vă jê̆ 1.000 ti hlak jên đi hlŏh khei ‘năr pơdreo ăn. Dơnŏ anĭh mong jên Tĕh đak hlôi athei rim hơnĭh bơ̆ jang kơ dêh char đei trong iung jang iŏk tơvĭh kon jên ăn tŏk iŏk hơdrol ‘nau. Ƀok Phạm Ngọc Nghị, Kơdră chĕp pơgơ̆r Dơnŏ anĭh vei lăng kon pơlei dêh char Dak Lăk tơbăt, dêh char jei hlôi pơm hla bơar athei pơdrĕo kon jên au, mă lei jei athei rim hơnĭh bơ̆ jang kơ dêh char hơlen mă brĕ vă vĕh ver tơdrong iŏk tơvih kon jên jang đang ‘nŏh kơdră kơpal iŏk tơvih jên: “Hơnĭh jang jên hu Tĕh đak tơbăt păng athei iŏk tơvĭh pơđĭ kon jên, tơdăh iŏk tơvĭh kon jên jang lei ư̆h kơ đei jên vă ăn kon jên, pơ tĭh gia nhen kon jên hrŭ ăn. Nhen Tơdrong vă jang Krông Pách thượng, dang ei oei dang 400 ti hlak jên vă kla ăn kon jên hrŭ ăn kon pơlei, tơdăh iŏk tơvih tơdrong au, Trung ương iŏk tơvĭh pơ đĭ kon jên jang ‘nŏh 400 ti jên au dêh char iŏk đơ̆ng yơ vă kla ăn kon pơlei. Kơna dang ei iŏk tơvĭh hăm trong ayơ, găh tơdrong jang yă kiơ, pơm lơ liơ mă ƀlep.”

        Tơdrong tơchơ̆t 99 sơnăm 2021 đơ̆ng Khul kơdră chĕp pơgơ̆r tĕh đak găh vei lăng, kla ăn, tơchơ̆t tơlĕch ăn tơdrong vă jang iŏk yua kon jên tĕh đak tơmơ̆t jên jang hlôi đei tơchơ̆t tôch hơdăh, mă hơdăh găh tơdrong iŏk iŏk jên jang hơdrol păng iŏk tơvĭh kon jên tŏk iŏk hơdrol. Lơ̆m au, tơdrong tơchơ̆t: “kon jên tŏk iŏk hơdrol hlŏh khei ‘năr pơkă kla ăn đơ̆ng rŏng 3 khei jô̆ đơ̆ng khei ‘năr kăl pơdrĕo kon jên tŏk iŏk hơdrol kiơ̆ tơchơ̆t lơ̆m hla bơar pơkăp dĭh băl mă bơngai iŏk jang tim mă iung jang dăh mă mư̆h ƀô̆h bơngai iŏk jang iŏk yua kon jên au vă tơmơ̆t jang tơdrong jang anai ‘nŏh tơngla tơmơ̆t jên jang gơ̆h pơrô̆, iung jang hơdoi hăm hơnĭh bơ̆ jang dăr lăng hơlen vă iŏk tơvĭh kon jên hlôi ăn tŏk iŏk hơdrol vă pơdrĕo ăn dơnŏ anĭh mong jên bơ̆ jang tĕh đak”. Mă lei, tơ̆ Dak Lăk oei đei tơdrong kon jên tŏk iŏk hơdrol đĭ hlŏh khei ‘năr pơkă trŭh sơnăm. Tơdrong mă au pơm ăn tơdrong chă apĭnh lơ lau, hăm rŏ đei tơdrong au to, kơ mơjĭt, kơ hrĕng ti hlak jên tĕh đak tơmơ̆t jang răm rim hơnĭh tơmơ̆t jên jang, rim hơnĭh mơdro sa iŏk yua kon jên au vă jang tơdrong jang anai, iŏk yua sa kơ dĭh dăh mă lơ liơ. ‘Nau jing tơdrong rim hơnĭh bơ̆ jang kơ dêh char Dak Lăk kăl tơchĕng hơlen vă tơlĕch ăn minh trong bơ̆ jang ‘lơ̆ng hlŏh dơ̆ng lơ̆m vei lăng kon jên tơmơ̆t jên jang trŏ ƀlep hlŏh.

Ƀai đơ̆ng Bơngai chĭh kơtơ̆ng ang kơ Radiô NPMVN oei tơ̆ Tây Nguyên

Tơblơ̆ nơ̆r: Amazưt