VOV4.Bahnar - Bơ̆ jang kiơ̆ trong hơ met ming khul jang tŏ sĕt bơ ngai, rơ gei đei yoa đơ̆ng rim anih jang chinh trĭ kiơ̆ tơ drong tơ chơ̆t Trung ương 6 (jăl XII), truh sơ năm 2025, dêh char Dak Lak vă kăt tơ jur hlŏh 3.800 ƀiên chê̆ bơ ngai jang kơ tĕh đak găh rim anih jang kơ pal kơ dêh char.

Anih pơ tho pơ hrăm Dak Lak gô tơ ƀâp lơ mơ mat tat mưh bơ̆ jang kiơ̆ trong kăt tơ jur bơ ngai jang

Kiơ̆ hla ar tơ roi đơ̆ng Anih jang Nô̆i vŭ dêh char Dak Lak, lơ̆m sơ năm 2021, dêh char hlôi kăt tơ jur hlŏh 10% kơ sô̆ ƀiên chê̆, hơ tŏ hăm dang 1.500 ‘nu bơ ngai. Đơ̆ng dang ei truh sơ năm 2025, tơ chĕng adrol lơ̆m dêh char vă hơ nơ̆ng kăt tơ jur hlŏh 3.800 ‘nu kăn ƀô̆, bơ ngai jang kơ tĕh đak găh dôm anih jang kơ pal kơ dêh char păng anih jang pơ vih pơ văn.

Ƀok Bạch Văn Mạnh, Kơ dră chĕp kơ̆l Anih jang Nô̆i vŭ dêh char Dak Lak ăn tơ băt: gô đei lơ mơ mat tat mưh bơ̆ jang kăt tơ jur bơ ngai jang, mă loi hăm anih jang pơ gang păng pơ tho pơ hrăm. Mă lei dêh char vă drin jang tơ drong ‘nâu trŏ thoi trong hlôi tơ lĕch. Tơ̆ hơ năp dang ei, sơ năm 2022 kăt tơ jur dang 800 ‘nu bơ ngai jang, đơ̆ng rŏng kơ ‘nŏh kăt tơ jur dang 1.000 ‘nu bơ ngai jang ăn tĕh đak lơ̆m 1 sơ năm.

Dơ̆ng: Tơ blơ̆