‘Nâu jĭ tơdrong kăl kơ lăng truh đei tơroi tơ̆ hop akŏm ‘măng mă 3, Khŭl kơdră pơgơ̆r Anih jang Đảng dêh char jăl XVII, pơgơ̆r kơsơ̆ 30/7. Găh hơtŏk tơiung mŭk drăm - tơpôl, lơ̆m khei 7, lơ tơdrong hơgăt iŏk đei kơsô̆ tŏk ‘lơ̆ng Pơm tơlĕch choh jang sa sơđơ̆ng, vei rong kon tơrong sơđơ̆ng jĭ hơbuh; akŏm jên tĕch le tơmam jô̆ pơhlom đei hloh 9.600 ti hlak jên, tŏk ƀiơ̆ pơting hăm khei hơdrol, tĕch mơdro, pơvih pơvăn tơiung ming pran hăm vă jê̆ 710.000 ‘nu tơmoi tơmang lăng, tŏk 41%. 

Akŏm jên thu mong ăn teh đak jô̆ pơhlom đei hloh 9.000 ti hlak jên, dang 67% jô̆ tơchĕng hơdrol kơ sơnăm. Bí thư Anih jang Đảng dêh char Đắk Lắk Nguyễn Đình Trung athei rim bơngai jang lơ̆m Khŭl kơdră pơgơ̆r Anih jang Đảng dêh char hơnơ̆ng dăr hơlen dôm tơdrong hơgăt, hơmet pơ ‘lơ̆ng tơhlăk tơhlĭn lơ̆m pơm tơlĕch tĕch mơdro, tơlĕch jên tơmơ̆t jang teh đak, hơmet ming bơ̆jang păng jang kiơ̆ trong jang tơgŭm ăn kon pơlei tơring kon kông.