VOV4.Bahnar - Hăm tơ drong tơm ưh kơ lê̆ đei ƀôh dôm tơ drong pơ nhŭl tơ mam sa păng dôm tơ drong jĭ kiơ̆ đơ̆ng tơ mam sa, lơ̆m năr Tết Trung thu sơ năm 2022, dêh char Dak Lak hlôi tơ lĕch jang năm hơ len lăng dôm hơ nih pơm tơ lĕch, tĕch mơ dro ƀĕng trung thu lơ̆m tơ ring. Kiơ̆ kơ ‘noh, đơ̆ng ‘năr 6 truh ‘năr 8 khei 9, dêh char Dak Lak gô pơ jing 1 khŭl năm hơ len lăng tơ̆ 6 apŭng, thị xăh păng pơ lei tơm hơ len lăng tơ drong pơm kiơ̆ dôm tơ drong hơ găt khôi luơ̆t găh vei sơ đơ̆ng rơ goh ‘lơ̆ng tơ mam sa đơ̆ng dôm hơ nih pơm tơ lĕch, tĕch mơ dro lơ̆m tơ ring.

Khŭl hơ len lăng gô akŏm lơ̆m dôm tơ mam đei yua lơ lơ̆m năr Tết Trung thu nhen: ƀĕng, mứt, kẹo, ƀier hơ lăk, ‘nhĕm, tơ mam đơ̆ng ‘nhĕm. Kŭm hăm tơ drong jang hơ len lăng, Khul gô jang hơ dai hăm dôm anih jang chih kơ tơ̆ng ang vă hơ tŏk loi dơ̆ng tơ roi tơ băt dôm tơ drong hơ găt găh vei sơ đơ̆ng rơ goh ‘lơ̆ng tơ mam sa truh hăm rim hơ nih pơm tơ lĕch, tĕch mơ dro tơ mam sa păng pơ tho kon pơ lei trong rơih iŏk, răt yua tơ mam sa rơ goh ‘lơ̆ng lơ̆m năr Tết Trung thu.

Thuem: Tơ blơ̆