Dôm năr blŭng khei 6, tơ̆ Hnam trưng THPT Buôn Ma Thuột, hŏk tro tơgenh rim jơ rơvơn vă hŏk dôm tơdrong, đơ̆ng pơm đê păng pơhrăm gah trong pơm ƀai. Oh Trần Quốc Trung, hŏk tro lăm 12A14 ăn tơbăt: tŏk bŏk oei akŏm pơhrăm dôm đê pơlong đơ̆ng dôm sơnăm hơdrol, lăng hơlen dôm đê pơlong kơ lơ hnam trưng nai vă hơmŏ ăn tơdrong set hŏk Đăi hŏk. Oh hlôi chih akŏm tơdrong hŏk pơhrăm hơdah ăn rim môn, kơchăng hơlen băt kơtơ̆ng ang păng trong iŏk bơngai hŏk đơ̆ng rim hnam trưng: “Inh akŏm pơhrăm dôm đê pơlong kơ dôm sơnăm hơdrol, chă apinh lơ đê pơlong kơ dôm hnam trưng phara băl, chih akŏm tơdrong hŏk ăn rim môn păng iŏk nơ̆r tơgop đơ̆ng dôm mạng tơpôl kơ đe 'nhŏng pơmai oh 'măng khuă hơdrol vă gơh đei jơnei nhen mơ̆t hŏk tơ̆ Đăi hŏk Kinh tê̆ Pơlei tơm Hồ Chí Minh hăm 3 môn tơm noh Yap Toán, Anh păng Lý.”

Đơ̆ng rŏng kơ dôm jơ hŏk hăt hot kơ đe hŏk tro noh đei tơdrong yak hơdoi đơ̆ng bơngai bơtho păng unh hnam. Duch bơtho Nguyễn Thị Xuân Hương, Kơdră Hnam trưng THPT Buôn Ma Thuột ăn tơbăt, đơ̆ng rŏng kơ pơkăp hŏk tro gơh hơgei kiơ̆ đơ̆ng dôm 'măng kim tra, hnam trưng hlôi chih akŏm tơdrong tơgŭm mă trŏ hăm rim hŏk tro. Hnam trưng adoi jang atŭm hăm mĕ ƀă păng hơnih jang pơgang vă vei lăng jơhngơ̆m jăn, đon bơnôh ăn hŏk tro hơdrol kơ 'măng pơlong: “Hăm đe hŏk tro mă jơhngơ̆m jăn kue, jang atŭm hăm hơnih jang pơgang vă pơtho ăn đe oh vei 'lơ̆ng jơhngơ̆m jăn akŏm ăn 'măng pơlong đĭ 'măng khuă.  Hăm khŭl hŏk tro tam mă juaih noh kơtă pơjao ăn bơngai pơhnŏng pơtho kơ khŭl juăt jang, pơtho ăn đe oh ưh hơdrô̆ tơ̆ hnam trưng mă 'nguaih kơ jơ hŏk hloh, ưh đei iŏk jên. Atŭm hăm noh adoi pơtruh nơ̆r hăm bơngai pơtho vei lăm kơchăng jang hơdoi đơ̆ng bơngai bơtho vei lăm, mĕ ƀă hŏk tro atŭm hăm đe kơdră hnam trưng vă sơđơ̆ng ăn đe hŏk tro gơh pơlong hloh hlăng”

Kiơ̆ Hơnih jang Pơtho Pơhrăm dêh char Đăk Lăk, tơdrong hŏk đei pơm kiơ̆ tơdrong hlôh vao kơ đe hŏk tro, hơlen tơnăp khŭl hŏk tro mă pơlong ưh kơ hloh 'măng khuă. Atŭm hăm tơdrong juăt jang, dêh char Đăk Lăk hlôi keh đang tôm tơdrong hơmŏ ăn 'măng pơlong. Jơ̆p dêh char đei 1 Jơnŭm pơgơ̆r pơlong hăm 64 hơnih pơlong tơm păng 55 hơnih pơlong hơmŏ; pơhlom 1.500 lăm pơlong tơm păng 40 lăm oei gô. Pơhlom 5.000 kang ƀô̆, bơngai bơtho, bơngai jang păng khŭl jang đei tơrĕk gô vang jang ăn 'măng pơlong.

Yă Lê Thị Thanh Xuân, Kơdră Hơnih jang Pơtho Pơhrăm dêh char Đăk Lăk ăn tơbăt, 'măng pơlong sơnăm ou noh đei lơ hŏk tro pơlong hloh, tơring pơgơ̆r pơlong să, 'noh athei hơvơn tôm hơnih jang chinh trĭ, pơtruh khŭl pơm jang vă vei lăng sơđơ̆ng 'lơ̆ng ăn tơdrong pơlong trŏ nhen tơchơ̆t tơlĕch: “Pơgơ̆r chă hơlen lăng tôm tơdrong păng tơtom pơgơ̆r dôm hơnih pơlong hơmet 'lơ̆ng lăm pơlong, kơƀang tang dŏ, camera, kơmăi kơmŏk; vei sơđơ̆ng ăn dôm hơnih pơlong đei rơih gơh đei tôm tơchơ̆t pơgơ̆r pơlong sơđơ̆ng. Gah tơdrong asong bơngai jang hlôi đei tôm kang ƀô̆, bơngai bơtho păng hơmet pơhrăm hơdah kiơ̆ trŏ pơkăp tơdrong pơm jang ăn tôm khŭl jang. Lăng atŭm, tơdrong jang hơmet, jang hơdoi iŏk jang sơnong truh khei năr ou đei vei sơđơ̆ng tơnăp păng trŏ pơkăp"

Hăm tơdrong hơmet đơ̆ng hrôih đơ̆ng rim hnam trưng, tơdrong yak hơdoi đơ̆ng bơngai bơtho păng tơdrong pơkăp jang đơ̆ng hơnih pơtho pơhrăm, Đăk Lăk tŏk bŏk oei yak ah khei năr mă hơtuch luch hơdrol kơ pơlong hăm pơkăp ưh hơdrô̆ vei sơđơ̆ng ăn 'măng pơlong, mă oei pơm trong hiôk vă rim hŏk tro, mă kăl noh đe hŏk tro tơring tơnap tap, gơh akŏm tơnăp tơdrong gơh kơ po.