Hơlen lăng tơ̆ minh ƀar kơchơ tĕch răt lơ̆m tơring pơlei tơm Buôn Ma Thuột nhen kơchơ Tân An, kơchơ tơm Buôn Ma Thuột, tơdrong tĕch răt tơmam drăm Têt pơtơm rơ-ông rơ-ang. Hăt hot hrôih hloh noh găh hơbăn ao hrŭk, chơkhŏ kơyep.

Dôm anih tĕch ƀanh kĕo, mư̆k, adoi tơbang đei lơ kơloăi, um ai. Pơmai Lê Thị Diễm Huyền, tĕch hơbăn ao tơ̆ Kơchơ Buôn Ma Thuột ăn tơbăt, khei năr âu, tơdrong răt ƀôh tŏk ƀiơ̆, mă lei pơmai duh oei kơchăng ƀơ̆t iŏk tơmơ̆t tơmam drăm: “Xơnăm âu duh răk tŏ xĕt tơmam guăng ‘lơ̆ng, xơnăm âu Noel păng Têt tơjê̆ băl noh kon pơlei tĕch pơdro adoi pơngơ̆t kơ đon. Tơdrong tĕch răt tơmam drăm xơnăm âu noh duh răh rai đĕch ưh đei lang lap ôh”

Kiơ̆ pơmai Nguyễn Thị Nga, tơ̆ phương Tân Hòa, pơlei tơm Buôn Ma Thuột, rim anih tĕch pơdro kơchăng tơmơ̆t tơmam drăm noh trŏ ƀlep hăm tơdrong kĕ đei kơ tơring. Kơlih nhen unh hnam pơmai, mă ƀôh kơchơ Têt đei lơ rơbeh rơbai tơmam drăm, mă lei pơmai ưh đei răt lơ nhen dôm xơnăm adrol: “Inh ƀôh tơmam drăm xơnăm âu tôm tơmam, kơjă adoi tŏk ƀiơ̆ hloh kơ xơnăm xơ̆ tŏ xĕt. Kơdih po inh noh răt dôm tơmam kiơ kăl đĕch, oei tơmam hơdrih noh jê̆ Têt pơtơm răt ăn dôm năr 30, năr mônh Tết, oei năr 2,3,4,5  noh đei kơchơ đe tĕch tôm bơih noh unh hnam inh ưh đei răt răk ‘măn hơngeo ôh”

Tơ̆ siu thĭ Co.opmart Buôn Ma Thuột, dang ei tơmam drăm ‘măn tĕch ăh Têt hlôi vih lơ; lơ̆m noh đei lơ tơmam drăm Việt đei 95%. Yă Trần Thị Thành Nhân, Phŏ Kơdră siu thĭ ăn tơbăt, xơnăm âu, ‘nguaih kơ pơm kiơ̆ pơkăp xơđơ̆ng kơjă, siu thĭ đei lơ tơdrong tơnăp tŏk iŏk oei đei iŏk yua hơnơ̆ng đơ̆ng dang ei truh ăh Têt: “Anih jang hlôi đei pơkăp răk tơmam drăm hăm pơkăp tŏk hloh pơtêng hăm xơnăm xơ̆ noh 15%, anih jang duh hlôi jang hadoi hăm dôm anih axong tơmam drăm pơkăp pơm tơlĕch duh nhen hơtŏk tơmam răk vei vă vei măh tơmam axong tôm păng lơ kơloăi. Siu thĭ Co-op mart hơnơ̆ng pơkăp xơđơ̆ng kơjă păng kơđeh hloh pơtêng hăm tơring tĕch răt đơ̆ng 5 truh 10%, atŭm hăm noh akŏm lơ tơmam tĕch tơjur kơjă vă hơtŏk tơdrong pơyua tơnăp ăn bơngai răt yua”

Đăk Lăk dang ei đei 148 kơchơ, 1 kơchơ tơm, 8 anih tĕch răt, siu thĭ păng hloh 60 anih tĕch tơmam kăl păng minh ƀar anih tĕch tơmam yua lơ̆m hnam. Kiơ̆ kơ ƀok Lưu Văn Khôi, Kơdră Anih Kŏng thương dêh char Đăk Lăk, tơmam ‘măn ăh Têt xơnăm âu tŏk pơhlom 56% pơtêng hăm xơnăm xơ̆: “Anih Kŏng thương nhôn hlôi bơ̆ jang hăm dôm anih pơm tơlĕch tĕch pơdro, dôm anih axong tơmam, siu thĭ, anih tơm tĕch răt vă pơkăl dôm anih jang âu hơtŏk pơm tơlĕch păng tĕch pơdro tơmam drăm đang kơ noh pơkăp vei xơđơ̆ng tơmam drăm vă măh axong tĕch ăn bơngai răt yua lơ̆m khei jê̆ đĭ xơnăm adoi nhen ăh Têt Nguyên đán Quý Mão 2023.”

Dêh char Đăk Lăk đei hloh 1,8 trĭu măt kon pơlei. Anih jang kơpal tơroi tơdrong kăl yua tơmam drăm lơ̆m khei têt gô tŏk 20% pơtêng hăm ‘năr hmă. Kơyuơ noh, Anih vei lăng kon pơlei dêh char Đăk Lăk axong hloh  1.510 tih hlj vă răk măh tơmam drăm kăl. Khul tơmam đei dêh char Đăk Lăk xơkơ̆t kăl xơđơ̆ng kơjă păng răk noh tơmam xa phe ƀa, ‘nhĕm nhŭng, ‘nhĕm ier, kơtăp ier bip, rơmă, xĭk, ƀôk ngok păng dôm tơmam xa nai, ‘nhot, plei ‘long, tơmam drăm kăl nai. Dang ei hlôi đei 10 anih jang mŭk drăm tih pơjing hơmet tơmam drăm, vei xơđơ̆ng tơmam răt yua, tơmam drăm kăl hăm pơhlom hloh 420 tih hlj.

Đơ̆ng dang ei truh adrol păng đơ̆ng rŏng kơ Têt Nguyên đán Quý Mão 2023, khul kơpal kơ dêh char Đăk Lăk hlôi kơhret hơlen tơring tĕch răt vă tom ƀôh băt, xek tơlang tơnăp dôm tơdrong pơm yoch glăi khôi luơ̆t nhen pơgâ̆m pơjĭp vei tơmam, tĕch răt tơmam kâ̆m, tơmam glăi, tơmam ưh hơdăh tơm hla chă, ưh đei hơnăn, pơgâ̆m lơ̆m tĕch pơdro.

Jơnŭm pơgơ̆r Anih tơm vei hơlen tơring tĕch răt dêh char Đăk Lăk ăn tơbăt, tŏk bŏk tơlĕch tơdrong jang ăn khei tơm tơjră tĕch pơdro tơtông glăi păng tĕch tơmam yăh lơ̆m dôm khei jê̆ đĭ xơnăm 2022 truh ăh adrol păng đơ̆ng rŏng kơ Têt Nguyên đán Quý Mão. Atŭm hăm noh, khul jang Vei hơlen tơring tĕch răt hơlen hloh 70 anih jang đei, dôm anih ‘măn tơmam drăm, akŏm tơmam drăm, dôm anih tơm tĕch pơdro, siu thĭ kơchơ tơm, jô̆ hloi tơ ‘ngla jang tĕch răt kiơ̆ mạng tơpôl... vă xek tơlang tơnăp dôm tơdrong pơm yoch glăi luơ̆t pơkăp tĕch pơdro, iŏk ăh khei năr jê̆ đĭ xơnăm, tơjê̆ Têt vă hơtŏk kơjă ưh kơ trŏ ƀlep.