Ƀok Phạm Tuấn Anh, Kơ dră Anih vei lăng choh jang xa păng atŏk tơ iung tơ ring tơ rang dêh char Dak Nông ăn tơ băt, đơ̆ng khei 9/2019 truh ƀât blŭng khei 10/2022, lơ̆m dêh char đei 113 ‘nu kăn ƀô̆, bơ ngai jang vei bri apinh pơ dơ̆h jang, 35 ‘nu bơ ngai năm jang tơ drong jang nai dơ̆ng. Kơ sô̆ bơ ngai pơ dơ̆h păng năm jang tơ̆ nai iŏk đei truh 20% akŏm đĭ đăng kơ sô̆ kăn ƀô̆, bơ ngai jang tơ̆ dôm anih vei lăng bri ‘long păng dôm công ty jang ‘long găh tĕh đak vei lăng. 

Bơ ngai vei lăng bri bơ̆ jang hăm lơ tơ drong mơ mat tat, krê hơ mơt, oei jên khei ‘nŏh ưh kơ măh vă pơ ‘nhŏ ăn tơ drong arih

Tơ drong lơ kăn ƀô̆, bơ ngai jang vei lăng bri apinh pơ dơ̆h jang roi pơm mơ mat hlŏh dơ̆ng ăn tơ drong vei lăng bri tơ̆ Dak Nông, mưh khul bơ ngai jang roi tŏ sĕt mă lei iŏk jang hloi lơ tơ drong, vei lăng tơ ring bri ‘long tôch xă. Tơ drong ‘nâu oei ƀơm ưh ‘lơ̆ng truh jơ hngâm đon bơ ngai oei bơ̆ jang hai, kơ na roi đunh roi đei lơ bơ ngai pơ dơ̆h jang mă ưh ‘nŏh năm jang tơ drong jang nai dơ̆ng. Vă găn tơ drong ‘nâu, ƀok Phạm Tuấn Anh ăn tơ băt, Anih vei lăng choh jang xa păng atŏk tơ iung tơ ring tơ rang vă roi tơ ƀôh ăn dêh char 1,2 trong tơ gŭm, pơ lung khul vei lăng bri; mă lei đunh đai ning mônh kơnh, tĕh đak kăl đei trong jang mă lăp vă pơm hơ tŏk iŏk yoa, tơ drong tơ gŭm ăn bơ ngai jang vă gơ̆h sơ đơ̆ng jơ hngâm vei lăng bri ‘long.