VOV4.Bahnar - Kiơ̆ kơ Anih vei lăng găh tơ drong jang - lĭnh rơ ka păng tơ pôl dêh char Dak Nông, ƀlep ƀơ̆t Têt Nguyên Đán Tân Sửu 2022, lơ̆m dêh char Dak Nông hlôi pơ gơ̆r rim khŭl bơ̆ jang năm tơ mang, pơ jao asong hloh 73.000 tơ pu tơ mam ăn rim anih jang, rim bơ ngai hơ gei, ŭnh hnam teh đak tơ gŭm, bơ ngai đei kŏng hăm kach mang. Akŏp jên đei kơ jă hloh 33 ti hlak jên đơ̆ng jên jang Teh đak, lơ̆m noh 1 kơ suơ̆t đei kơ jă đơ̆ng 300.000 - 1 triệu hlak jên mơ̆ng kiơ̆ rim bơ ngai. Mă hơ dăh ‘noh, dôm bơ ngai đei iŏk tơ mam Têt Nguyên đán ‘noh đei: Bơ ngai đei kŏng hăm kach mạng, ŭnh hnam lĭnh lôch dŏng teh đak; ŭnh hnam dơ nuh hin ‘noh bơ ngai kon kông; bơ ngai sa jên tơ gŭm tơ pôl; kang ƀô̆ pơ dơh hưu; ŭnh hnam đei kon tŏk bŏk bơ̆ jang tơ̆ Trường Sa, Hnam hơ drơ̆l DK1; pơ lei pơ la kon kông. Ƀok Y Long – Phŏ Kơ dră Anih vei lăng găh bơ ngai jang - lĭnh jĭ rơ ka păng tơ pôl dêh char Dak Nông tơ roi:

“Đảng, teh đak hơ nơ̆ng bơ ngơ̆t truh vei lăng ăn kon pơ lei đei phĭ tơ nŏ. Pơ tih gia lơ̆m năr Têt âu, dêh char Dak Nông asong ăn 1 pơ lei 10 triệu hlak jên vă kon pơ lei sa têt. Hơ drol sơ̆ đei tơ drong lê̆ lon bơ ngai, mă lei sơ năm ‘nâu hlôi pơ jao ăn kơ dră xăh dăr hơ len rim ŭnh hnam. Đơ̆ng rŏng ‘noh ‘moi kiơ̆ pơ gơ̆r mặt trận, jơ nŭm ‘long pơ glang ƀrê apŭng vă dăr hơ len dôm ŭnh hnam dơ nuh hin hlôi ƀlep ưh. Tơ dăh oei ưh kơ tôm ‘noh pơ jao ăn rim pơ lei dăr hơ len dơ̆ng, ưh kơ lê̆ lon ŭnh hnam hơ yơ”.

Thuem: Tơ blơ̆